«Қашқадарё соҳили» сайилгоҳида жамоат тартибини сақлаш ва фуқаролар хавфсизлигини таъминлашга сафарбар этилган Миллий гвардия ҳарбий хизматчилари ва бефарқ бўлмаган фуқаролар Қарши шаҳридаги Ислом Каримов кўчасидан оқиб ўтувчи Қашқадарё дарёсига сакраб, ўз жонига қасд қилмоқчи бўлган фуқароларнинг ҳаёти сақлаб қолди. Бу ҳақда Миллий гвардия матбуот хизмати «Дарё» маълум қилди.
Биринчи ҳолатда 1 февраль куни соат 15:10 ларда 18 ёшли фуқаро С.Р. кўприкдан ўзини ташламоқчи бўлган. Ўқувчи қиз хизмат вазифасини бажараётган Миллий гвардия ҳарбий хизматчилари Д.Жакбаров ва А.Қурбонов томонидан ўз вақтида қутқариб қолиниб, РШТЁИМ Қарши филиалига етказилган ва тиббий текширув ўтказилганда унда ҳеч қандай тан жароҳатлари аниқланмаган. Маълум бўлишича, фуқаро С.Р. оила аъзолари билан ўзаро зиддият туфайли шу ишга қўл урган.
Иккинчи ҳолат эса 3 февраль куни тахминан соат 14:50 ларда дарё қирғоғи олдида содир бўлган. 2000 йилда туғилган вақтинча ишсиз фуқаро А.Х. қўлида бўлган шиша синиғини ўзининг бўйин ва қорин соҳаларига санчиб олиб, ўзини дарёга ташлаган. Юз берган воқеани кўрган Ободонлаштириш бошқармаси ишчиси Ш.Мирзоева дарҳол шу ҳудудда хизмат вазифасини бажараётган Миллий гвардия ҳарбий хизматчилари О.Раҳматов ва А.Усмоновга хабар берган.
Ҳарбий хизматчилар зудлик билан фуқаро А.Х.ни сувдан қутқариб чиқиб, унга биринчи тиббий ёрдам кўрсатиб, РШТЁИМ Қарши филиалига етказган. Тиббиёт ходимлари томонидан фуқаро А.Х га тез тиббий ёрдам кўрсатилиб, жонлантириш бўлимига ётқизилган. Ҳозирда унинг аҳволи қониқарли даражада. Мазкур ҳолат юзасидан Қарши шаҳар прокуратураси томонидан суриштирув ишлари бошланган.
Изоҳ (0)