Жалақудуқ туманига янги ҳоким тайинланди
Андижон вилояти Жалақудуқ тумани халқ депутатлари Кенгашининг 4 февраль, сешанба куни, бўлиб ўтган навбатдан ташқари сессиясида туманнинг янги ҳокимини тайинлаш масаласи кўриб чиқилди. Бу ҳақда «Дарё» мухбири хабар берди.
Маълум қилинишича, айни пайтга қадар вилоят халқ таълими бошқармаси бошлиғи вазифасида ишлаб келаётган Фурқат Бузруков Жалақудуқ тумани ҳокими этиб тайинланди.
Фурқат Бузруков турли йилларда Андижон вилояти ҳокимлиги иқтисодиёт ва ижтимоий ривожлантириш масалалари бўйича котибияти етакчи мутахассиси, Андижон шаҳар педагогика коллежи директори, маданият ва спорт ишлари ҳамда ўрта-махсус касб-ҳунар таълими бошқармалари бошлиғи лавозимларида фаолият юритиб келган. У 1985 йил 30 июнда Андижон туманида туғилган. Маълумоти олий. 2010 йилда Андижон давлат университетини тамомлаган.
Туманнинг собиқ ҳокими Содиқжон Турдиев Республика «Нуроний» жамғармасига раис ҳамда Президент фармони билан сенатор этиб тайинланган эди.
