Ўзбекистон Президенти Шавкат Мирзиёев жорий йилнинг 5 февралида Россияга ташриф буюриши ҳақида хабар берилган эди. Мазкур масала юзасидан Россия президенти матбуот котиби Дмитрий Песков баёнот билан чиқиб, Мирзиёевнинг Москвага ташрифи режада бўлмаганини билдирди.
«5 февраль кунига бундай ташриф режалаштирилмаганди. Президент ташрифи бўйича ҳеч қандай режа йўқ эди, шу туфайли ташриф қолдирилгани тўғрисидаги гапга ўрин йўқ. Бу тўғри маълумот эмас», — дея Песковнинг сўзларини келтирган «РИА Новости».
Бундан аввалроқ «Компания» журнали Россия Ташқи ишлар вазирлигидаги манбасига асосланиб, Шавкат Мирзиёевнинг 5 февраль куни Москвага амалга оширилиши керак бўлган ташрифи бекор қилингани тўғрисида хабар тарқатганди.
Эслатиб ўтамиз, Шавкат Мирзиёев 5 февралда Россияга ташриф буюриши ҳақида Олий Мажлис Сенати раисининг биринчи ўринбосари Содиқ Сафоев ўтган йилнинг октябрь ойида хабар берган эди. Россия парламенти раиси Валентина Матвиенко мазкур маълумотни тасдиқлаб, Ўзбекистоннинг Евросиё иқтисодий иттифоқига қўшилиш тарафдори эканини очиқлаган эди. Ўзбекистон Ташқи ишлар вазирининг ўринбосари Илҳом Неъматов эса «РИА Новости»га берган интервьюсида ташриф 5 февралга режалаштирилганини айтган эди.
24 январда эса Ўзбекистон ташқи ишлар вазири Абдулазиз Комилов Россия ташқи ишлар вазири Сергей Лавров билан телефон орқали суҳбатлашиб, Шавкат Мирзиёевнинг Россияга ташрифига тайёргарлик масалаларини муҳокама қилганди.
Изоҳ (0)