Хитойнинг Xinjiang Hualing Industry & Trade (Group) Co., Ltd. компанияси Тошкент шаҳридаги «Чорсу» меҳмонхонасини қайта таъмирлаш ва янгилаш лойиҳасига жалб қилиниши мумкин. Мазкур лойиҳа Хитой компанияси ва Тошкент шаҳар ҳокими Жаҳонгир Ортиқхўжаев ўртасида бўлиб ўтган учрашувда муҳокама қилинди. Бу ҳақда шаҳар ҳокимлиги хабар берди.
Маълум қилинишича, Жаҳонгир Ортиқхўжаев Xinjiang Hualing Industry & Trade (Group) Co., Ltd. компанияси президенти Ми Эн Хуа билан учрашган.
Қайд этилишича, компания раҳбариятини йирик логистика лойиҳасини амалга ошириш, савдо мажмуаси ва меҳмонхона қуриш масаласи қизиқтиради. Шундан келиб чиққан ҳолда Тошкент шаҳар ҳокимлигида ўтказилган учрашувда Жаҳонгир Ортиқхўжаев компания вакилларини пойтахтда амалга оширилиши режалаштирилган йирик лойиҳалар билан таништирди.
Дастлаб, Чирчиқ дарёсининг шаҳардан оқиб ўтувчи қисмидаги манзилларни тартибга келтириш орқали бўшайдиган майдонда савдо мажмуаси, технопарк, яшил ҳудудлар ва турар жойлар қурилишига мўлжалланган лойиҳа юзасидан маълумот берилди. Яна бир лойиҳа Тошкентнинг Қозоғистон билан чегарасидаги майдонда бажарилиши кўзда тутилган бўлиб, у логистика маркази, қишлоқ хўжалиги ва бошқа турдаги маҳсулотларни саралаш пункти қуришга йўналтирилган. Шунингдек, компания раҳбариятига Яккасарой туманида бунёд этилиши кўзда тутилаётган бизнес маркази лойиҳасида иштирок этиш, «Чорсу» меҳмонхонасини янгилаш каби қатор лойиҳалар юзасидан маълумот берилди.
Ми Эн Хуа тақдим этилган лойиҳалар Хитой томонида катта қизиқиш уйғотгани ва улар бу таклифларни атрофлича ўрганиб, ҳамкорлик юзасидан ўз хулосаларини тақдим этишини маълум қилди.
Маълумот учун, Xinjiang Hualing Industry & Trade (Group) Co., Ltd. Хитой Халқ Республикасидаги энг йирик компаниялардан ҳисобланади. Мазкур компания йирик улгуржи савдо марказларига эга бўлиб, 26 та шўъба корхонани бирлаштиради ва уларда 3000 дан ортиқ ишчи хизмат қилади.
Эслатиб ўтамиз, 12 йилдан буён вайрона аҳволда бўлган «Чорсу» меҳмонхонаси 2019 йили ишга туширилиши ҳақида ўтган йилнинг май ойида хабар берилганди. «Чорсу» меҳмонхонасини реконструкция қилиш ишлари билан туркиялик инвестор Аҳмет Демир шуғулланаётгани ҳақида хабар тарқалган эди. Кейинроқ Аҳмет Демир меҳмонхонани реконструкция қилиш ишлари суст кетишида Тошкент шаҳар ҳокимлигини айблаган, туркиялик ишбилармоннинг мазкур эътирозларига Тошкент шаҳар ҳокимлиги мутасаддилари жавоб қайтарганди.
Кейинчалик мазкур объект туркиялик инвестордан қайтариб олинди ва сотувга қўйилди, бироқ кўп вақт ўтмай меҳмонхона сотувдан қайтариб олинди. Шундан сўнг, меҳмонхона бошланғич 1 сўм қийматида қайта сотувга қўйилди. 2019 йилнинг декабрь ойида Туркиянинг Elite World Hotels компанияси «Чорсу» меҳмонхонаси биносида 5 юлдузли меҳмонхона ташкил қилишга қизиқиш билдирди.
Изоҳ (0)