Ўзбекистон ташқи ишлар вазири Абдулазиз Комилов 3 февраль, душанба куни, расмий ташриф билан Тошкентда бўлиб турган АҚШ давлат котиби Майкл Помпео билан учрашди.
«Gazeta.uz»нинг хабар беришича, учрашувдан сўнг журналистлар билан суҳбатлашган Майкл Помпео Абдулазиз Комилов билан ишбилармонлик муҳитини яхшилаш, қонун устуворлигини мустаҳкамлаш ва Ўзбекистон ҳаётининг барча жабҳаларида барқарор иқтисодий имкониятларни таъминлаш йўлларини муҳокама қилганини маълум қилди.
Унинг сўзларига кўра, АҚШ яқинда республикага молиявий сектор ва солиқ сиёсатининг асосий ислоҳотлари учун техник ёрдам кўрсатади.
Помпео АҚШ Ўзбекистонга капитал бозорини ривожлантиришга, шунингдек, мамлакатнинг молиявий ислоҳотларига ёрдам бериш ниятида эканини таъкидлади. Ўзбекистонга ушбу мақсадларда техник ёрдам кўрсатиш учун 1 миллион доллар ажратиш масаласи Конгресс томонидан маъқулланиши кутилмоқда.
«Биз бу ишларни Америка Ўзбекистон учун ҳақиқий шерик ва дўст бўлгани учун қилмоқдамиз. Биз Америка хусусий инвестициялар секторининг хусусий инвестициялари икки мамлакат ўртасида ҳаракатланишини истаймиз. Инвестициялар оқими барқарор ўсишига эришишнинг янги иш ўринларини яратиш ва фаровонликни оширишдан бошқа яхшироқ йўли йўқ», — дейди Помпео.
Майкл Помпео Афғонистондаги тинчлик муҳитини қўллаб-қувватлашга қаратилган мунтазам ҳаракатлари учун ўзбекистонлик ҳамкасбларига миннатдорлик билдирди.
«Шу муносабат билан АҚШ Ўзбекистон билан Афғонистон ўртасидаги савдо-сотиқ ва алоқаларни кенгайтириш учун 1 миллион доллар ажратишини мамнуният билан эълон қиламан.
Ўзбекистон билан Афғонистон ўртасидаги алоқаларни мустаҳкамлаш нафақат бу ерда ёки Афғонистонда, балки бутун Марказий Осиёда ва унинг ташқарисида тинчлик ва фаровонликни таъминлайди», — дейди Помпео.
Изоҳ (0)