Ишсизлик ёшларнинг синиши ва ўзи истамаган бошқа йўлни танлашига сабаб бўлади. Олий Мажлис Қонунчилик палатаси депутати Расул Кушербаев шундай фикр билдирган.
Депутатга кўра, Пенсия жамғармаси маъсуллари «инновацион» ҳисоб-китоблари асосида ишлаб чиқаётган концепцияси доирасида пенсия ёшини ошириш бўйича оммага сингдираётган ғоясини кўриб шундай хулосага келиш мумкин: ёшини яшаб бўлган қариялар ёшларни ишсиз қолдирмоқчи.
Амалда ҳозир эркаклар учун пенсия ёши 60, аёллар учун 55 ёшни ташкил этади. Энди буни эркакларга 62 ёш, аёлларга 58 ёш қилишмоқчи.
Агар пенсия ёши бир ёшга оширилса, бу ўртача бир йилда пенсионерлар ҳисобига бўшаши мумкин бўлган 200 мингдан 250 мингтагача иш ўрнининг бўшамаслиги ва меҳнат бозорига кириб келган ёшларнинг унга эгалик қила олмаслигига сабаб бўларкан.
Бир йилда мамлакат меҳнат бозорига ўртача 600 минг ёшлар кириб келаётганини ҳисобга олинса, иш ўрни бўшамаслиги оқибатида бир неча йилда қанча юз минглаб ёшлардан иборат қўшимча ишсизлар «армияси» пайдо бўлади.
«Улар нима қилади? Омади келгани бизнесга, омади келмагани эса ўзини четга уриши аниқ. Қарияларни тинмай ишлатишни ўйлаётган мутахассисларимиз масаланинг бу томонига эътибор бермаган кўринади», — дейди депутат.
Кушербаевнинг қайд этишича, Пенсия жамғармаси масъуллари бераётган баёнотларида ишончларининг юқорилигидан, улар аллақачон парламент розилигисиз ҳам пенсия ёшини ошириш масаласини ҳал этиб қўйган кўринади. Улар Конституция ва қонунларга мувофиқ, қонунларни, шу жумладан, пенсия ёшини ўзгартиришни қабул қилиш ваколати парламентда эканлигини ё билишмайди ё писанд қилмоқчи эмасдек.
Аслида бу уларнинг таклифи холос ва Парламент буни қабул қилмаслиги мумкин. Давлат раҳбари даражасида ҳукуматнинг парламент олдидаги ҳисобдорлигини ошириш, парламентни «халқ уйи»га айлантириш вазифаси қўйилган бир вақтда бундай баёнотлар Пенсия жамғармасининг парламент, халқ билан ҳисоблашишга хоҳиши йўқлигини кўрсатмоқда.
«Бироқ шуни унутмангки, токи қишлоқларда пенсия ёшига етиб боришини кутаётган қариялар, ишга жойлашишни орзу қилаётган юз минглаб ёшларнинг розилиги олинмагунча, кўришга кўз отишга ўқингиз йўқ депутатларнинг тасдиғидан ўтмагунча пенсия ёшини ўзгартиришни бориб сувга айтинг. Сиз қариялар ва ёшларни ўйламасангиз, биз ўйлаймиз. Чунки улар бизга ишонган, бизга овоз берган. Пенсионерлар ва ёшлар манфаатларини ҳимоя қилишни дастурларига киритиб, ваъда берган партиялар вакилларига ҳам масалага бефарқ бўлмасликларини сўрардим», — дея фикрини якунлаган Кушербаев.