«Дарё»да мурожаатчи шикоятига кўра, Косон туманидаги мактабларда ўқувчилар 4 номдаги журналга обуна бўлишга мажбурланаётгани, Қозоқли қишлоғидаги 14-мактабда ушбу ҳолат юз бергани ҳақида хабар бергандик.Косон туман ҳокимлиги ахборот хизмати мазкур хабарни рад этди.
— Мазкур таълим даргоҳига бориб вазият ўрганилганда мурожаатчининг важлари ўз исботини топмади, — дейилади ҳокимлик ахборот хизмати маълумотида.
«Ота-оналарга танишиб чиқиш мақсадида берилган таклиф қоғозига назар ташлайдиган бўлсак, ‘Доно’ нашриётининг 4 номдаги журналлари келтирилган ва уларга 1 йиллик обуна учун тўлов миқдори таништириб ўтилган. Лекин маълумотноманинг мазмун-моҳияти мажбурий обуна бўлиш деган тушунчани англатмайди. Ота-оналарга ихтиёрий равишда мазкур журналларга обуна бўлиш ёки сотиб олиш мумкинлиги айтилган.
‘Доно’ нашриёти ходимлари дарс соатларига халақит қилмаган ҳолда Қашқадарё вилоятида жойлашган мактаб ўқувчилари ўртасида тарғибот тадбирларини олиб борган. Журнал фаолияти билан таништирган. Бироқ ҳали Косон туманидаги мактаблар мазкур журналларга обуна бўлмаган ва ҳеч кимдан пул йиғиб олинмаган.
Бизнинг мактабга нашриёт ходимлари 2019 йилнинг декабрь ойида келишган эди. Улар ихтиёрий равишда ота-оналар ўртасида сўровнома ўтказишини, маълумот сифатида тўлдирилган махсус варақа беришини айтишди. Мен уларга ота-оналар билан бемалол суҳбатлашиб, журналнинг фаолияти билан таништиришларини айтдим. Лекин мажбурий обунага йўл қўйилмаслигини, буни ўзим жиддий назорат қилишимни ҳам тушунтирдим. Ходимлар ўқувчилар ва ота-оналар ўртасида журнал фаолиятини тарғиб қилишганини эслайман. Аммо ҳали бизнинг мактабда ҳеч кимдан обуна учун пул йиғилмади ва обуна бўласан деб ҳам айтилмади»,— дейди 14-мактаб директори Зариф Тиловов.
— Мажбурий ва ихтиёрий деган тушунчаларнинг бир-биридан фарқи бор, — дейди «Доно» нашриёти вакили Сардор Қўшақов. Журналларимизнинг республикада ўз ўрни бор, минглаб ўқувчиларимиз севиб ўқишади. Лекин ҳали биз бирор марта ота-оналардан мажбурлаб обунага пул йиғмаганмиз. Тарғибот ишларини олиб борганмиз. Бунинг нимаси ёмон? Болалар журналларни ўзлари хоҳлаб ўқиса, шеърлари ёки расмлари чоп этилса яхши-ку. Кимдир журнал сотиб олишга ёки обуна бўлишга пули етмайдими, демак, сотиб олмасин.
— Маҳалламизга нашриёт ходимлари келганини яхши эслайман, улар 4 та журнал фаолияти билан таништиришди. Ўша суҳбатда ўзим ҳам қатнашган эдим. Тарғибот қилишди, тушунтиришди. Агар хоҳиш бўлса, обуна бўлишимизни ва бунинг учун ўқитувчи ёки мактаб директорига эмас, нашриётнинг ўзига мурожаат этишимизни айтишди. Нашриёт обуна бўлганларга журналларни ўз вақтида етказиб бериш хизматини ҳам зиммасига олди. Обуна бўлишга улгурганим йўқ-ку, аммо ўша пайтда журналлардан сотиб олган эдим, — дейди Нормурод Аллаёров.
Тарқалган хабарлар юзасидан 14 мактабда ота-оналар ва масъуллар иштирокида йиғилиш ўтказилди. Унда нашриёт ходимлари ҳам қатнашди. Муҳокамалар жараёнида ота-оналар ҳали журналларга обуна бўлмаганини ва мажбурий обуна қилиш ҳолатлари кузатилмаганини маълум қилди.
Туман халқ таълими бўлими вакиллари эса мажбурий обунага йўл қўйилмаслигини ва бу бўлим томонидан назоратда эканини айтди.
«Газета ёки журналларни тарғиб қилиш, аҳолини таништириш, маълумот бериш бу мажбурий обуна ҳисобланмайди. Қолаверса, ҳеч кимдан мажбурий обуна учун пул йиғилмаганини инобатга олсак, ‘Daryo.uz’га мурожаат билан чиққан фуқаронинг ҳавотирлари ўринсиз экани аён бўлади», дейилади Косон туман ҳокимлиги ахборот хизмати хабарида.
Изоҳ (0)