21 январь куни Россиянинг Томск вилояти, Асино тумани, Причулмский аҳоли яшаш пунктидаги бир қаватли ёғочдан қурилган уйда ёнғин чиқиши оқибатида шу ерда яшаб, ишлаган 11 нафар Ўзбекистон фуқароси вафот этди. Ҳалок бўлган фуқароларнинг 9 нафари Навоий вилоятининг Қизилтепа туманидан, бир нафари Самарқанд вилоятининг Каттақўрғон туманидан, яна бири Андижон вилоятининг Андижон туманидан. «Дарё» мухбири Лайло Ҳайитова Қизилтепа туманида бўлиб, марҳумларнинг оила-аъзолари билан суҳбатда бўлди.
Ёнғин оқибатида ҳалок бўлган қизилтепаликларнинг етти нафари 20–25 ёш атрофида бўлган.
Шаҳзод Муртазоев (1999 йил), Темур Элмуродов (1994), Ҳошимжон Эргашев (1999), Бунёд Ҳасанов (1994), Муҳаммадали Зокиров (1998)лар тумандаги «Милтиқчи» маҳалласидан. Хуршид Мўминов (1997), Рамзиддин Ғайбуллоев (1998), Меҳриддин Норов (1966), Келдиёр Боймуродов (1987)лар эса «Гумбаз», «Маданият», «Оқсоч» маҳаллаларида истиқомат қилган.
Ташқаридаги ва ичкаридаги меҳнат муҳожирлари ҳақида бошқа материаллар:
Маълум бўлишича, вафот этганларнинг аксарияти бири-бирига яқин қавм-қариндошлар. Рамзиддин Ғайбуллоев Меҳриддин Норов билан ота-бола бўлса, Темур Элмуродов Меҳриддин Норовнинг синглисининг ўғли. Каттақўрғонда истиқомат қилган Умид Ҳасанов эса Бунёд Ҳасанов билан ака-ука эди.
Темур Элмуродовнинг онаси Мавлуда Норованинг сўзларига кўра, ўғлининг вафот этганини эшитганидан сўнг эри инсулт бўлган.
Бир йўла ўғлим, акам ва жиянимдан жудо бўлдим. Уларсиз қандай яшайман. Аксига олиб, отаси ҳам Россияда. Ўғлимиз Темурбекдан айрилганимизни эшитгач, миясига қон қуйилиб, инсулт бўлибди. Касалхонага ётқизишибди. Дардимни кимга айтай, қайси деворга бошимни урай. Охирги суҳбатлашганимда тизза бўйи қор ёққани учун ҳозирча ишлашмаётганини айтгандиМарҳумнинг опаси Хушвақт Элмуродова эса мудҳиш воқеа содир бўлган куни укаси билан 3,5 соатдан кўпроқ вақт Имо мессенжери орқали суҳбатда бўлган. Темур 3–4 ойдан буён меҳнат ҳақини олишмаётгани, яшаш жойида ток йўқлигидан норози бўлиб гапирган.Мавлуда Норова, Темур Элмуродовнинг онаси
Мен ҳам Россиянинг бошқа вилоятида ишлайман. Ўша кун воқеа содир бўлишидан олдин укам билан қоронғида узоқ гаплашдим. У: «Опа, телефонни ўчиринг, энди ухлай, уч соатдан кейин ишга чиқаман», деб айтди. Яшаш уйлари ёғочдан бўлса-да, шароити яхши эди. Аммо уйни ҳеч қачон электр печка билан иситишган эмас. Навбатма-навбат ўтин ёқишарди.Хушвақт Элмуродова, Темур Элмуродовнинг опаси
Навоий вилояти ҳокимлиги ва Қизилтепа туман ҳокимлиги фаоллари вафот этганларнинг хонадонларида бўлиб, уларнинг оила аъзоларига ҳамдардлик билдиряпти. Моддий ёрдамдан ташқари, малакали шифокорлар томонидан тиббий ва руҳий ёрдам ҳам кўрсатилмоқда.
Марҳум Ҳошимжон Эргашевнинг хонадонида бўлганимизда онаизорнинг руҳан ўзида эмаслигини англаш қийин кечмади. Боласининг коллежни битириб, олий ўқув даргоҳига киролмагач, дунё кўрай, ўзгарай, деб ўзга юртга ишлаш учун кетишга қилган қарорига рози бўлганидан минг бор афсусда.
Болалигидан меҳнатда пишган эди-да, болагинам. Не-не умидлар билан янги бошлаб қўйган иморати ҳувиллаб қолди. Ўқувчилик пайтлари ҳам ота-онамнинг соғлиги йўқ, рўзғорга пул топай, деб новвойлик, ошпазлик қиларди болагинам. Маросим куни ҳам тобутининг бошига қўлида нон ушлаб, кулиб турган суратини қўйишди. Ўзи биринчи бор четга чиққанди, эндигина тўрт ой бўлганди.Ҳошимжон Эргашевнинг онаси
Марҳум Бунёд Ҳасановнинг хонадонида акаси Умид Ҳасановнинг ҳам таъзия маросими ўтказилган. Ака-уканинг аммаси Дилором Ҳасанованинг сўзларига кўра, Бунёд фожиадан олдин онаси билан телефонда гаплашган.
Ҳозир укам ва келинимиз жуда оғир аҳволда. Умиджонимизнинг тўрт нафар боласи отасиз қолди. Бунёдимиз эса ҳали уйланмаган, ёш эди. Спортга жуда қизиқарди. Келиннинг айтишича, ўша куни у ўғли билан кечки соат 23:30 ларгача телефон орқали гаплашиб, дардлашган. Кутилмаганда шовқин, тўс-тўполон бошланган ва «тарақ-туруқ» қилиб, телефон ўчиб қолган. Шу билан Бунёд билан қайта боғланиш имкони бўлмаган.Дилором Ҳасанова, Бунёд ва Умид Ҳасановларнинг аммаси
Дилором Ҳасанованинг сўзларига кўра, Бунёд онаси билан Тошкент вақти билан соат 23:30 (Томск вақти билан 01:30) гача телефон орқали гаплашган. Россия Фавқулодда вазиятлар вазирлиги маълумоти бўйича ёнғин ҳақидаги маълумот Томск вақти билан 04:05 да келиб тушган. 06:35 га келиб ёнғин тўлиқ бартараф этилган.
Дилором Ҳасановага кўра, бу мудҳиш воқеа содир бўлишидан бир неча кун олдин жияни унга телефон қилган. Қизилтепалик мигрантлар Ўзбекистон байроғини силкитиб, уни ўрмон ичидаги ўзлари яшайдиган ёғоч уй шифтига илган. «Ўзбекистоннинг ана шундай бақувват йигитлари бор», — дея ғурурланиб, Ўзбекистон мадҳиясини ҳам куйлашган. Уларнинг бу хатти-ҳаракатларига нисбатан эса иш бошқарувчилар томонидан қаршилик кўрсатилган. «Байроғингни олиб қўй, нонингни егин ва кет бу ердан!», дея пўписа қилишган.
«Ўзбекистон шаънини ҳимоя қиламан, деб жувонмарг бўлишди», — деди Дилором Ҳасанова.
Маълумот учун: Янги йил байрамида Россиянинг Санкт-Петербург шаҳридаги «Дворсовая» майдонида ҳамроҳларининг елкаларига ўтириб олиб, Ўзбекистон байроғини ҳилпиратган меҳнат муҳожирлари полиция эътиборини тортганди. Видеоёзувлар орқали полиция 14 нафар Ўзбекистон ва Тожикистон фуқаросини қидириб топган. Текширилган 14 кишининг ҳар бирида миграцион камчиликлар аниқланган ва уларнинг бир нечтаси депортация қилинганди.
Изоҳ (0)