Ички ишлар вазирлиги Кадрлар бош бошқармаси ва Ўз хавфсизлиги бошқармаси раҳбариятидан иборат ишчи гуруҳ томонидан 2019 йилнинг 13 декабридан жорий йил 7 январига қадар республиканинг барча ҳудудий ички ишлар органларида тарбиявий-профилактик тадбирлар ўтказилди. Бу ҳақда ИИВ ахборот хизмати хабар бермоқда.
Мазкур тадбирларда хизмат интизомини қўпол равишда бузган, ўз бурчига масъулиятсизлик билан ёндашган ходимларга нисбатан кескин чоралар кўрилди. Жумладан, 32 нафар ходим хизматдан бўшатилди, 57 нафари эгаллаб турган лавозимидан озод этилди, 12 нафарининг унвони бир поғона пасайтирилди, 76 нафар ходимга нисбатан бошқа турдаги интизомий жазо чоралари қўлланилди.
Йиғилишларда шахсий таркибга коррупцияга қарши иммунитетни шакллантириш борасидаги вазифалар тўғри ва таъсирчан қилиб етказилгани натижасида жорий йилнинг биргина январь ойида ходимларга пора таклиф этиш билан боғлиқ 20 та ҳолат аниқланиб, айбдор шахсларга нисбатан жиноят ишлари қўзғатилди.
Айни вақтда юқоридаги буйруқ талабларидан келиб чиқиб, вазирликнинг таркибий тузилмалари ва ҳудудий бўлинмаларида учта йўналишда иш олиб борилмоқда:
- жамоалардаги маънавий-руҳий муҳит ўрганилмоқда;
- тарбиявий ишлар бўйича ўринбосарларнинг фаолияти текширувдан ўтказилмоқда;
- раҳбар кадрлар захирасини шакллантириш мақсадида селексия ишлари олиб борилмоқда.
Изоҳ (0)