«Ўзатом» бош директори «Ўзкимёсаноат» АЖ бошқарув раиси вазифасини бажарувчи этиб тайинланди

«Ўзкимёсаноат» акциядорлик жамияти бошқаруви раиси вазифасини бажариш Энергетика вазирининг биринчи ўринбосари – «Ўзатом» агентлиги бош директори Жўрабек Мирзамаҳмудовга юклатилди. Бу ҳақда Энергетика вазирлиги Матбуот хизмати хабар берди.

Таъкидланишича, Вазирлар Маҳкамасининг «Ўзкимёсаноат» АЖ раҳбар кадрларини лавозимларга тасдиқлаш тўғрисида»ги қарорига мувофиқ, «Ўзкимёсаноат» АЖ бошқаруви раиси вазифасини бажариш Энергетика вазирининг биринчи ўринбосари – «Ўзатом» агентлиги бош директори Жўрабек Мирзамаҳмудовга юклатилган.

Эслатиб ўтамиз, Жўрабек Мирзамаҳмудов 2019 йилнинг февралида энергетика вазирининг биринчи ўринбосари этиб тайинланганди.

Жўрабек Мирзамаҳмудов 1979 йилда туғилган, 2001 йилда «Умид» жамғармаси йўлланмаси бўйича Алабама университетини (АҚШ), 2005 йилда эса Тошкент кимё-технология институтини тамомлаган. 2018 йилнинг июнидан «Ўзатом» агентлигини бошқариб келмоқда.