Ургут тумани «Муғол» маҳалласида яшовчи Х.Қ. фуқаро М.С. билан қонуний никоҳда бўлсада, 2017 йилда Тайлоқ туманида яшовчи фуқаро Д.М. билан шаръий никоҳдан ўтган. 2019 йилнинг май ойидан 2019 йил 26 ноябрь кунига қадар бўлган вақт давомида ўз хонадонида икки нафар турмуш ўртоғи билан умумий рўзғор асосида эр-хотин бўлиб биргаликда яшаб келган. Бу ҳақда «Дарё» мухбири Фарҳод Норбўтаев хабар бермоқда.
Жиноят ишлари бўйича Тайлоқ туман судида бўлиб ўтган суд мажлисида судланувчи Х.Қ. ўз айбига тўлиқ иқрорлик билдириб, ҳақиқатда 2006 йилда М.С. билан қонуний никоҳдан ўтиб, бирга яшаб келаётганлигини билдирган. Кўп фарзандлари ёшлигида вафот этганлиги сабабли турмуш ўртоғи М.С. касал бўлиб қолган. Д.М. билан турмуш қуришига Х.Қ.нинг биринчи ва қонуний хотини М.С.нинг ўзи рози бўлган. М.С. эрига кундоши унинг ҳам соғлиғига қарашини, уй-рўзғор ишларида унга ёрдамчи бўлишини, иккисини ҳам хафа қилмаслигини тушунтирган.
Х.Қ. 2017 йилнинг 5 февраль куни Д.М. билан шаръий никоҳдан ўтиб, оила қурган.
Маълум бўлишича, Х.Қ. дастлаб икки нафар турмуш ўртоғи билан отаси У.Қ.нинг хонадонида яшаган. 2019 йилнинг май ойидан буён Ургут тумани «Муғол» маҳалласидаги ўзига тегишли бўлган икки хонали уйда икки нафар турмуш ўртоғи ва икки нафар фарзанди билан бирга яшаб келган.
Судда Х.Қ.нинг биринчи турмуш ўртоғи М.С. 2016 йилда соғлиғи яхши эмаслиги сабабли турмуш ўртоғига иккинчи хотин олишига розилик берганлигини билдириб ўтган.
Ургут тумани «Муғол» маҳалласида оилаларда маънавий ахлоқий қадриятларни мустаҳкамлаш ва хотин-қизлар билан ишлаш мутахассиси Д.Камолова судда Х.Қ.нинг қонуний никоҳдан ўтган биринчи турмуш ўртоғи М.С.нинг кўзи яхши кўрмаслигини, иккинчи гуруҳ ногиронилиги, турмуш ўртоғига иккинчи хотин олишига ўзи рози бўлиб кундоши Д.М. билан яхши яшаб келаётганлигини маълум қилган.
Жиноят ишлари бўйича Тайлоқ туман суди раиси Марат Эргашевнинг маълум қилишича, судланувчи Х.Қ. Ўзбекистон Республикаси Жиноят кодексининг 126-моддаси (Кўп хотинли бўлиш, яъни умумий рўзғор асосида икки ёки ундан ортиқ хотин билан эр-хотин бўлиб яшаш) билан айбли деб топилиб, унга нисбатан иш ҳақининг 20 фоизи миқдорини давлат фойдасига ундириш шарти билан бир йил олти ой ахлоқ тузатиш ишлари жазоси тайинланди.
Изоҳ (0)