Ўзбекистон Республикаси Президентининг 2017 йил 9 мартдаги «Ўзбекистон Республикасида углеводород хом ашёсини қазиб олишни янада ошириш чора-тадбирлари тўғрисида»ги қарори доирасида «Ўзбекнефтгаз» АЖ томонидан бир гуруҳ ОАВ вакиллари учун «Андижоннефть» АЖга қарашли конларга пресс-тур уюштирилди.
29 январь, чоршанба куни «Андижоннефть» АЖ бошқарув раиси Жалолиддин Бекмуродов ва мутахассислар иштирокида ўтказилган матбуот анжуманида 2019 йил тўртинчи чорагида амалга оширилган ишлар ва келгусидаги режалар ҳақида маълумот берилди. Шунингдек, журналистларни қизиқтирган қатор саволларга ҳам жавоблар берилди.
«Очиғини айтиш керак, Андижонда 2017 йилга қадар газ умуман қазиб олинмаган. Бор эътибор ва куч фақат нефть қазиб олишга йўналтирилган. Ҳаттоки, ўша пайтларда бурғуланаётган жойдан газ чиқиб қолса, бундай қудуқлар ёпиб ташланган ва бошқа жойларда нефть қазиш ишлари давом эттирилган. Бунинг сабаби шуки, газ етказишга устуворлик берилмаган ва газ қазиб оладиган мутахассислар жуда ҳам кам бўлган.
2017 йилда давлатимиз раҳбарининг соҳамизга тааллуқли муҳим қарори имзолангач, газ қазиб олиш масаласига эътибор кучайди ва бурғулаш ишлари жадаллашди. Натижада янги газ қатламлари топилиб, эскиларини таъмирлаш орқали газ олиш суръатлари кескин юқорилади. Бугунги кунда мутахассисларимизнинг малакасини доимий равишда ошириб бориш учун барча чоралар кўриляпти.
Ўтган йилнинг ноябрь ойида олиб борган изланишларимиз давомида вилоятнинг Булоқбоши туманида янги газ қатламлари мавжудлиги аниқланди. Шундан сўнг, бурғулаш ишларига киришдик ва жараён мобайнида олдин бурғулаб бўлинган қудуқлар бўйича ҳам изландик. Саъй-ҳаракатларимиз туфайли у ерларда ҳам газ қатламлари борлиги ойдинлашди ва газ етказиб беришни бошладик. Бунинг оқибатида, кунига 650—700 минг метр куб газ қазиб оляпмиз ва барчасини аҳолига етказяпмиз. Мазкур кўрсаткич 2017—2018 йилларда ўртача 50 минг метр куб эди», — деди Жалолиддин Бекмуродов.
«Дарё» мухбири Миролим Исажоновнинг хабар беришича, айни пайтда Андижон ва Фарғона вилоятида 14 та газ қудуғи ишламоқда. Таҳлилларга кўра, андижонликларнинг зангори оловга бўлган эҳтиёжи қиш мавсумида кунига 5 миллион метр куб атрофида, ёзда эса бу кўрсаткич 600—700 минг метр кубни ташкил этади. Чунки ёз ойларида газга нисбатан талаб пасаяди. Аммо бу газ қазиб олиш ҳажмига акс таъсир кўрсатмайди, яъни қазилган газ ҳажми юқорилигича кетаверади ва одамлар эҳтиёжидан ортиб қолгани Хўжаобод туманидаги ерости газни сақлаш мажмуасига захирага олинади. Мавжуд захирадаги газни қиш фаслида аҳолига етказиб бериш режалаштирилган.
«Шу кунларда яна 3 та қудуқдан газ қазиб олиш ишлари бошланади. Бу орқали эса вилоятимиз аҳолисига суткасига 1 миллион метр куб газ етказиш имкониятига эга бўламиз.
Президентимиз яқинда Олий Мажлисга йўллаган Мурожаатномасида геология соҳасини янада ривожлантиришга катта аҳамият қаратилишини таъкидлади. Жорий йилда истиқболли конларни аниқлаш ва мавжуд захираларни кўпайтириш учун давлат бюджетидан 2 триллион сўм маблағ ажратилиши айтилди. Геологияга бўлган эътибор боис ҳамда газ қазиб олиш ҳажминининг ўсиш суръати шу ёсинда давом эттирсак, узоғи икки йил ичида бутун Андижон вилояти эҳтиёжини вилоятдаги қудуқлардан қазиб чиқариладиган газ эвазига тўлиқ бажаришга эришамиз», — деди «Андижоннефть» АЖ бошқарув раиси.
Изоҳ (0)