Beeline алоқа оператори томонидан ўз абонентлари учун ўтказилаётган лотереянинг қонунийлиги ўрганилмоқда. Бу ҳақда Ўзбекистон Капитал бозорини ривожлантириш агентлиги маълум қилди.
Агентлик томонидан таъкидланишича, ҳозирги кунда Beeline (Unitel МЧЖ) алоқа тармоғининг хизмат кўрсатиш зонасида ViaMobi МЧЖ томонидан «Ғолиб бўл ва ютиб ол!» акцияси ўтказилмоқда.
Хабарда айтилишича, Beeline абонентлари ушбу акцияда иштирок этишга чорлайдиган SMS хабарлар олиши кузатилмоқда. Хусусан, абонентлар ҳисобини тўлдирганида уларга ютуқли лотереяда қатнашишга имкон берадиган баллар тақдим этилганлиги ҳақида «ютуқли лотереяда 500 баллни қўлга киритдингиз» мазмунидаги SMS хабар келиб тушмоқда.
Агентликнинг маълум қилишича, лотерея ташкилотчилари бўлган Beeline ва ViaMobi МЧЖ Ўзбекистон ҳудудида лотерея ташкил этиш ва ўтказиш имкониятини берадиган махсус лицензияга эга эмас.
Капитал бозорини ривожлантириш агентлиги акция ташкилотчиларидан уни ташкиллаштириш ва ўтказиш тартибини белгилайдиган барча зарур ҳужжатларни олиб, ўрганишни бошлади. Шу билан бирга, агентлик Unitel МЧЖ ва ViaMobi МЧЖ томонидан ташкиллаштирилган «Ғолиб бўл ва ютиб ол!» акцияси лотерея эмаслиги маълум қилди.
Фуқароларнинг ҳуқуқларини ҳимоя қилиш, шунингдек, Beeline абонентлари томонидан акция моҳияти нотўғри талқин қилинишининг олдини олиш учун агентлик Unitel МЧЖ ва ViaMobi МЧЖга SMS хабарларни юборишда «лотерея» сўзини чиқариб ташлаш тўғрисида сўров юборган.
Шунингдек, ҳозирги пайтда агентлик ушбу акциянинг ўтказиш тартиби ва қоидаларини ўрганишда давом этмоқда.
Маълумот учун, лотерея — бу кенг аҳоли маблағларини жалб қилишни ўз ичига оладиган таваккалчиликка асосланган ўйин. Шу сабабдан, уни ташкил этиш ва ўтказиш тартиби қонун билан тартибга солинади. Уни ташкил этиш ва ўтказиш эса лицензияланадиган фаолият тури ҳисобланади.
Агентликнинг таъкидлашича, савдони рағбатлантириш мақсадида пул-буюм ютуқли ўйинларни акция ва конкурс сифатида ташкил этиш ва ўтказиш лицензияланмайди, аммо ушбу акцияда қатнашганлик учун қўшимча ҳақ олинмайди.
Қайд этилишича, ҳозирда телекоммуникация тизимларидан фойдаланган ҳолда кенг миқёсли конкурслар ва акциялар ташкил қилиш ҳолатлари учрамоқда. Шу билан бирга, аҳоли орасида оммабоп бўлган, акциялар шаклида ўтказилаётган баъзи пул-буюм ютуқли ўйинларда лотерея белгилари мавжуд. Агентлик бундай ўйинлар пайтида фуқаролар мулкига зарар етказилишининг олдини олиш мақсадида амалдаги қонунчиликни такомиллаштиришни режа қилган.
Изоҳ (0)