Хитойда коронавирусдан тузалган Цзян фамилияли аёл касаллик ҳақида сўзлаб берди, деб ёзмоқда «ИноСМИ» нашри Sinxua ахборот агентлигига таяниб.
Аёл 44 ёшда бўлиб, Ушань уездининг Чунцин шаҳрида яшайди. Аёл охирги йиллар янги коронавирус тарқалиш маркази ҳисобланган Ухань шаҳрида ишлаб келган. Цзян 15 январь, чоршанба куни, Хитой Янги йилини кутиб олиш учун она шаҳрига жўнаган. Кутиб олиш учун темир йўл вокзалига келган аёлнинг эри унинг ўзини нохуш ҳис қилаётганига гувоҳ бўлган ва шу заҳоти уни маҳаллий шифохонага олиб борган. Бир неча кунлик даволаниш ҳеч қандай ижобий натижа бермаган. 21 январь, сешанба куни эса аёл «Санься» марказий шифохонасига олиб келиниб, изоляторга жойлаштирилган ва унга янги турдаги коронавирус келтириб чиқарувчи зотилжам ташхиси қўйилган.
«Мен бу касалликка учраган Чунциндаги илк бемор бўлдим, шифокорлар ва ҳамширалар менга алоҳида эътибор билан қарашди», — дейди аёл.
Унинг таъкидлашича, ҳар куни унга турли воситалар пуркаб туришган, вирусга ва инфекцияга қарши даволаш муолажаларини амалга оширган, шифокорлар ҳаттоки Хитой табобати усулларини қўллаган.
«Охирги кунлар касалликнинг аломатлари йўқола бошлади. Шифокорлар менга жавоб бериш мумкинлигини айтди. Шифохона даволаш учун мендан бир фэнь (1 фэнь — 0,01 юан) ҳам олмади. Мендан кўплар касаллик қўрқинчлими, деб сўрашади. Менимча, энг асосийси — ўзингиз қўрқмаслигингиз, ниқоб тақиш ва қўлларни тез-тез ювиш зарур. Тана ҳарорати ошса, йўтал ва бошқа аломатлар пайдо бўлса, фурсатни бой бермай касалхонага югуриш керак. Сизни бошқалардан ажратиб қўйишларидан қўрқманг, бардам бўлинг, врачларга қулоқ тутинг, уларга ишонинг, шунда албатта тузалиб кетасиз», — дея сўзларини якунлаган аёл.
Изоҳ (0)