Россияда янги турдаги коронавирусни юқтириб олиш билан боғлиқ дастлабки икки ҳолат қайд этилди, дея хабар бермоқда Meduza. Россия бош вазири ўринбосари Татяна Голикованинг маълум қилишича, вирус Байкалорти ўлкаси ва Тюмен вилоятида бўлган Хитойнинг икки фуқаросида аниқланган.
«Роспотребнадзор» раҳбари Анна Попованинг қўшимча қилишича, ҳар иккала касалланганнинг аҳволи барқарор деб баҳоланмоқда, клиник белгилар ва ҳарорат йўқ.
Голикованинг таъкидлашича, Россия ҳукумати коронавирус ўчоғи ҳисобланган Ухань шаҳри жойлашган Хубэй вилоятидан россияликларни эвакуация қилади. Маълумотларга кўра, Уханда 300 нафар, Хубэйда эса 341 нафар россиялик бор. Бош вазирнинг айтишича, барча россияликлар 4 февралга қадар қайтариб олиб келинади.
Россия ҳукумати хитойликларга ишчи виза беришни тақиқлаш тўғрисидаги қарорни тайёрламоқда, дея маълум қилди Голикова.
Шунингдек, «Аэрофлот»нинг Пекин, Шанхай, Гонконг ва Гуанжчоуга рейсларидан ташқари, Хитой билан барча авиақатновлар, шунингдек, Хитой авиакомпанияларининг Москванинг Шереметево аэропортига рейслари бекор қилинади. Янги авиатартиб 1 февралдан кучга киради.
Бундан ташқари, Россия Мўғулистон билан чегарада чеклов ўрнатади. Аввалроқ, 31 январдан Хитой билан чегара ёпилган эди.
Голикованинг қўшимча қилишича, Россия ҳукумати Хитой билан почта ва юк ташувларини тўхтатмайди.
Изоҳ (0)