Фарғона вилояти ИИБ бошлиғи ўзини ташвишлантираётган ҳолатларни санаб ўтди

Фарғона вилояти ички ишлар бошқармаси бошлиғи, полковник Дониёр Тошхўжаев журналист ва блогерлар билан «Очиқ ва шаффоф ҳамкорликдамиз» мавзусида матбуот анжумани ўтказди.

ЎзАнинг ёзишича, Тошхўжаев вилоятдаги икки ҳолат уни ташвишга солаётганини таъкидлади.

«Иш бошлаганимга қисқа вақт бўлган бўлса-да, шаҳар ва туманлардаги вазият билан танишиш ҳаракатидаман. Ҳуқуқбузарлик ва жиноятчиликка қарши курашиш бўйича олиб борилаётган ишлар ва рақамларга тўхталмоқчи эмасман.

Вилоятда йўл-транспорти ва тиғли нарсалар билан боғлиқ нохуш ҳолатларнинг кўп учраётгани ташвишланарлидир. Иш бошлаган биринчи куним Қўқон шаҳрида пиёдаларга йўл бермаслик, қоидаларга амал қилмаслик, бозорлардаги автотураргоҳларнинг тирбандлигини кўрдим.

Қоидабузарликлар жуда кўп. Жарима солиш осон, аммо фуқароларимизда қонунларга ҳурмат, ҳуқуқий онг ва маданиятни шакллантиришимиз керак.

Маълумотларга қараганда, вилоятда ўтган йилда 983 та йўл-транспорт ҳодисаси содир бўлган. Бундан 230 таси ўлим, 842 таси турли тан жароҳатлари билан якунланган», — деди Дониёр Тошхўжаев.

Маълумот учун, Дониёр Тошхўжаев 22 январь, чоршанба куни Фарғона вилояти Ички ишлар бошқармаси бошлиғи лавозимига тайинланди. Бунга қадар у ИИВ ҳузуридаги Тергов департаменти бошлиғи лавозимида фаолият юритган.