Хитой молия вазирлиги коронавирусга қарши курашиш учун қарийб 3,9 миллиард доллар миқдорида маблағ ажратди, деб хабар бермоқда «РИА Новости».
Қайд этилишича, 29 январь ҳолатига кўра, мамлакатнинг барча молиявий институтлари профилактика ва назорат ишлари учун 27,3 миллиард юан ёрдамчи маблағ ажратди. Бундай ҳажмдаги маблағларни ажратиш Хитой компартияси марказий комитети ва давлат кенгаши стратегиясига мувофиқ амалга оширилмоқда.
Коронавирус ўчоғи Хубэйдаги Ухань шаҳри ҳисобланади. Ҳозирги кунда вирусдан 170 киши вафот этгани, 7 711 киши касаллангани маълум. Шунингдек, 12 167 киши вирус юқтириб олганликда гумон қилинмоқда.
Касалланиш ҳолати Хитойдан ташқари Жанубий Корея, Япония, АҚШ, Таиланд, Канада, Вьетнам, Сингапур, Непал, Франция, Австралия, Малайзия, Камбоджа ва Германияда ҳам қайд этилган.
Хабарда айтилишича, вирус бир метрдан икки метргача масофада ҳаво-томчи йўли, шунингдек, ифлос қўлларни кўзларга тегизиш орқали юқади.
Касалликнинг асосий белгилари — қуруқ йўтал, нафас қисилиши, нафас олиш етишмовчилиги, иситма, заифлик. Айрим ҳолларда касаллик пневмониясиз, фақатгина қуруқ йўтал ва баланд бўлмаган ҳарорат билан бирга ўтади, аммо аломатлари енгил бўлса ҳам, бемор бошқаларга ҳам касаллик юқтириши мумкин.
Изоҳ (0)