Tomsk viloyati gubernatori Sergey Jvachkin Prichulim posyolkasida sodir bo‘lgan yong‘in oqibatida halok bo‘lgan 12 nafar fuqaroning o‘limida elektroqurilmalar emas, balki mansabdor shaxslar aybdor ekanligini ma’lum qildi, deb xabar beradi “Vtomske.ru”.
Eslatib o‘tamiz, 21-yanvar kuni Prichulim posyolkasida yong‘in sodir bo‘lgandi. Yog‘ochsozlik bilan shug‘ullanadigan ishchilar guruhining bir qavatli uyi yonib ketishi oqibatida jami 12 kishi — 11 nafari O‘zbekiston fuqarosi va bir nafar rossiyalik yonib ketgandi. Dastlab yong‘in nosoz elektr qurilmasi sabab yuzaga kelgani taxmin qilingandi. Halok bo‘lganlarning barchasi yong‘in sodir bo‘lgan uyda ro‘yxatda turgan. Uy esa inson yashashi uchun yaroqsiz hisoblangan.
“12 nafar insonning o‘limida isitgichlar, elektr tarmoqlari va oynadagi panjaralar aybdor emas. Insonlarning xavfsizligini ta’minlamagan mansabdor shaxslar aybdor. Aybdorlar ismini huquq-tartibot organlari va sud ma’lum qiladi. Ammo hozirdan aytish mumkinki, fojiaga elementar xavfsizlik qoidalariga rioya qilinmaganlik sabab bo‘lgan. Bunga esa biznes egalari va ularni nazorat qiluvchi organlar javob beradi”, — deydi Jvachkin.
Gubernatorning so‘zlariga ko‘ra, tumanlar rahbarlari o‘z hududlarida nima sodir bo‘layotganidan boxabar bo‘lishi kerak. Uning ta’kidlashicha, ularda muhojirlarning ish va yashash sharoiti haqida ma’lumot bo‘lishi kerak.
Mavzuga doir:
Eslatib o‘tamiz, O‘zbekiston Prezidenti Shavkat Mirziyoyevning ko‘rsatmasiga asosan yong‘inda halok bo‘lgan va jabrlangan fuqarolarning oila a’zolariga yordam ko‘rsatish maqsadida hukumat komissiyasi tuzilgan.
Izoh (0)