Ўзбекистонда онлайн аукцион орқали сотиб олиш мумкин бўлган бўш ерлар ҳақидаги маълумотлар ва уларнинг очиқ электрон харитаси ишлаб чиқилди.
Эндиликда исталган интернет фойдаланувчиси E-kadastr.uz платформасидаги онлайн харита орқали масофадан туриб Ўзбекистон ҳудудидаги барча бўш турган ерларнинг жойлашувини кўриши, ер майдони ҳақидаги бирламчи маълумотлар билан танишиши, ушбу ерни сотиб олиш истаги туғилганда бу ҳақда таклиф юбориши мумкин.
«Геоинфоком» давлат унитар корхонаси раҳбари Ҳусан Исаев маълумотига кўра, Президентнинг 2019 йил 26 августдаги қарорида бўш турган ерларни очиқ ва шаффоф равишда онлайн аукционга чиқариш принциплари белгилаб берилган.
Ер ресурслари, геодезия, картография ва давлат кадастри давлат қўмитаси E-kadastr.uz порталини ишга туширган. Порталнинг ишга туширилишидан кўзланган мақсад бўш турган ер участкаларининг очиқ электрон харитаси бўлиб, унга қўмита органлари томонидан туманлар кесимида аниқланган бўш ер участкалари тўғрисидаги маълумотлар ҳар ойнинг 5-санасига қадар мунтазам киритилиб, база янгилаб борилади.
«Жисмоний ва юридик шахслар бўш ер участкаларини аниқ инвестиция мажбуриятлари билан электрон аукционга қўйишни сўраб таклиф киритишлари мумкин», – дейди Исаев.
23 январь ҳолатига кўра, республика бўйича 4427 та ер участкаси бўш турибди. E-kadastr.uz платформасидаги онлайн харита орқали бўш турган ерларни вилоят, туман, шаҳар кесимида кўриш имкони мавжуд.
Аввал ерларга туман ҳокимининг розилиги, яъни ҳоким қарори билан эгалик қилиш мумкин эди. Ҳозирги ўзгаришларга кўра, исталган шахс аукционда ютиб чиқиб, ер ўз номига хатлаши мумкин. Барча савдолар онлайн тарзда қонуний амалга оширилади.
«Давергеодезкадастр» қўмитаси раиси Абдушукур Абдуллаевнинг сўзларига кўра, олдинлари аукцион ўтказилаётган пайтда иштирокчиларнинг жараённи кузата олмай қолиши ёки интернет ўчиб қолиши каби ҳолатлар бўлиб турарди. Бу каби ҳолатларнинг олдини олиш мақсадида туман ва шаҳар марказларида интернет билан таъминланган кичик хоналар ташкил этилади. Бундай вазият кузатилса, аукцион қайта ўтказилади.
Изоҳ (0)