O‘zbekistonda onlayn auksion orqali sotib olish mumkin bo‘lgan bo‘sh yerlar haqidagi ma’lumotlar va ularning ochiq elektron xaritasi ishlab chiqildi.
Endilikda istalgan internet foydalanuvchisi E-kadastr.uz platformasidagi onlayn xarita orqali masofadan turib O‘zbekiston hududidagi barcha bo‘sh turgan yerlarning joylashuvini ko‘rishi, yer maydoni haqidagi birlamchi ma’lumotlar bilan tanishishi, ushbu yerni sotib olish istagi tug‘ilganda bu haqda taklif yuborishi mumkin.
“Geoinfokom” davlat unitar korxonasi rahbari Husan Isayev ma’lumotiga ko‘ra, Prezidentning 2019-yil 26-avgustdagi qarorida bo‘sh turgan yerlarni ochiq va shaffof ravishda onlayn auksionga chiqarish prinsiplari belgilab berilgan.
Yer resurslari, geodeziya, kartografiya va davlat kadastri davlat qo‘mitasi E-kadastr.uz portalini ishga tushirgan. Portalning ishga tushirilishidan ko‘zlangan maqsad bo‘sh turgan yer uchastkalarining ochiq elektron xaritasi bo‘lib, unga qo‘mita organlari tomonidan tumanlar kesimida aniqlangan bo‘sh yer uchastkalari to‘g‘risidagi ma’lumotlar har oyning 5-sanasiga qadar muntazam kiritilib, baza yangilab boriladi.
“Jismoniy va yuridik shaxslar bo‘sh yer uchastkalarini aniq investitsiya majburiyatlari bilan elektron auksionga qo‘yishni so‘rab taklif kiritishlari mumkin”, – deydi Isayev.
23-yanvar holatiga ko‘ra, respublika bo‘yicha 4427 ta yer uchastkasi bo‘sh turibdi. E-kadastr.uz platformasidagi onlayn xarita orqali bo‘sh turgan yerlarni viloyat, tuman, shahar kesimida ko‘rish imkoni mavjud.
Avval yerlarga tuman hokimining roziligi, ya’ni hokim qarori bilan egalik qilish mumkin edi. Hozirgi o‘zgarishlarga ko‘ra, istalgan shaxs auksionda yutib chiqib, yer o‘z nomiga xatlashi mumkin. Barcha savdolar onlayn tarzda qonuniy amalga oshiriladi.
“Davyergeodezkadastr” qo‘mitasi raisi Abdushukur Abdullayevning so‘zlariga ko‘ra, oldinlari auksion o‘tkazilayotgan paytda ishtirokchilarning jarayonni kuzata olmay qolishi yoki internet o‘chib qolishi kabi holatlar bo‘lib turardi. Bu kabi holatlarning oldini olish maqsadida tuman va shahar markazlarida internet bilan ta’minlangan kichik xonalar tashkil etiladi. Bunday vaziyat kuzatilsa, auksion qayta o‘tkaziladi.
Izoh (0)