АҚШ Касалликларни назорат қилиш ва олдини олиш маркази (CDC) мамлакатда янги коронавирус билан касалланган бешта ҳолатни аниқлади, деб хабар беради «Коммерсантъ».
Аввалроқ коронавирус сабаб Хитойда ҳалок бўлганлар сони 80 кишига етгани ҳақида хабар берилганди.
«26 январь ҳолатига кўра, тўртта штатда (Аризона, Калифорния, Иллинойс, Вашингтон) Ухань шаҳридан келган сайёҳларнинг бештасида вирус аниқланган», — дейилади CDC хабарида.
Бундан ташқари, Франция бош вазири Эдуард Филипп Ухандан мамлакатга қайтишни истаган барча францияликларни эвакуация қилиш бўйича қарор қабул қилган. Франция соғлиқни сақлаш вазири Анес Бузенга кўра, жорий ҳафтанинг ўрталаридан бошлаб эвакуация қилиш бошланади. Мамлакатга қайтарилган Франция фуқаролари икки ҳафта давомида карантинда бўлади. Франциядаги туроператорлар иттифоқи Хитойга саёҳатларни 21 февралга қадар тўхтатган.
Хитойда янги турдаги коронавирус келтириб чиқарган пневмония авж олгани сабабли Қозоғистонда санитар назорати чоралари кучайтирилди. Олмаота аэропортида Хитойдан учиб келган самолётдаги «бемор»ни кутиб олиш бўйича саҳналаштирилган машғулот ўтказилди.
Хитойнинг Ухань шаҳри коронавирус ўчоғи ҳисобланади, бу ва яна бир неча шаҳар карантинга ёпилган. Аввалроқ Хитой раҳбари Си Цзиньпин коронавирус билан боғлиқ вазиятни «мураккаб» деб атаб, касалликнинг тарқалиш суръати ошганини тан олган эди.
Мавзуга доир:
- Хитойда тарқалган коронавирус ҳақида билиш зарур бўлган маълумотлар
- ТИВ Хитойда бўлиб турган ёки у ерга бормоқчи бўлган Ўзбекистон фуқароларини огоҳликка чақирди
- Хитойда тарқалган янги коронавируснинг илк аломатлари маълум қилинди
- Хитойда ўқиётган ўзбекистонликлардан коронавирус ҳақида нотўғри маълумот тарқатиб, вазиятни кескинлаштирмаслик сўралди
Изоҳ (0)