Франция ҳукумати хоҳиш билдирган барча фуқароларини Хитойнинг Ухань шаҳридан қайтаришга қарор қилди. Бу ҳақда, Франция Соғлиқни сақлаш вазирлиги ахборотига асосланиб, «РИА Новости» хабар бермоқда.
Эслатиб ўтамиз, Хитойдаги коронавирус эпидемияси сабаб, Ухань шаҳрига кириш ва ундан чиқиш ҳозирча тақиқланган, шаҳар карантин остида.
«Франция бош вазири шундай хоҳиш билдирган барча французларни Ухандан Францияга қайтариш ҳақида қарор қабул қилди. Улар, Хитой расмийлари билан келишилган ҳолда, ҳафта ўрталарида қайтарилади», — дейилади хабарда.
Франция соғлиқни сақлаш вазири Анес Бузеннинг қўшимча қилишича, Хитойдан «қайтарилган фуқаролар 14 кун мобайнида назорат остида бўлади».
Маълумот учун, Ухань шаҳрида 30 нафардан 60 нафаргача ўзбекистонлик бўлиши мумкин, уларнинг аксарияти талабалардир. Аввалроқ Ўзбекистон Ташқи ишлар вазирлиги карантин эълон қилинган Ухань шаҳридан чет эл фуқароларини эвакуация қилиш бўйича мурожаатларга Хитой расмийлари рад жавобини бераётганини маълум қилган эди.
«Карантин киритилганидан сўнг бошқа давлатнинг элчихоналари ўз фуқароларини Ухандан эвакуация қилгани тўғрисидаги хабар ҳақиқатга тўғри келмайди», — дейилганди ТИВ ахборотида. Ўз навбатида, Ўзбекистон ёшлар умумжаҳон ассоциацияси Хитойдаги ўзбекистонлик талабалардан коронавирус билан боғлиқ вазият юзасидан нотўғри маълумот тарқатиб, вазиятни кескинлаштирмасликни сўраган эди.
Бунгача эса Ўзбекистон ташқи ишлар вазири Абдулазиз Комилов Ухандаги ўзбекистонлик талабалар «албатта олиб келиниши», бу борада Хитой расмийлари билан иш олиб борилаётганини маълум қилган эди. 26 январь куни эса Хитойда таҳсил олаётган ўзбекистонликларнинг биринчи гуруҳи қайтарилгани маълум бўлди — улар Тошкент аэропортининг ўзида жиддий текширувдан ўтказилган.Сўнгги маълумотларга кўра, коронавирус билан касалланганлар сони Хитойнинг ўзида 2744 кишига етган, 80 киши вафот этган.
Изоҳ (0)