AQSh Kasalliklarni nazorat qilish va oldini olish markazi (CDC) mamlakatda yangi koronavirus bilan kasallangan beshta holatni aniqladi, deb xabar beradi “Kommersant”.
Avvalroq koronavirus sabab Xitoyda halok bo‘lganlar soni 80 kishiga yetgani haqida xabar berilgandi.
“26-yanvar holatiga ko‘ra, to‘rtta shtatda (Arizona, Kaliforniya, Illinoys, Vashington) Uxan shahridan kelgan sayyohlarning beshtasida virus aniqlangan”, — deyiladi CDC xabarida.
Bundan tashqari, Fransiya bosh vaziri Eduard Filipp Uxandan mamlakatga qaytishni istagan barcha fransiyaliklarni evakuatsiya qilish bo‘yicha qaror qabul qilgan. Fransiya sog‘liqni saqlash vaziri Anyes Buzenga ko‘ra, joriy haftaning o‘rtalaridan boshlab evakuatsiya qilish boshlanadi. Mamlakatga qaytarilgan Fransiya fuqarolari ikki hafta davomida karantinda bo‘ladi. Fransiyadagi turoperatorlar ittifoqi Xitoyga sayohatlarni 21-fevralga qadar to‘xtatgan.
Xitoyda yangi turdagi koronavirus keltirib chiqargan pnevmoniya avj olgani sababli Qozog‘istonda sanitar nazorati choralari kuchaytirildi. Olmaota aeroportida Xitoydan uchib kelgan samolyotdagi “bemor”ni kutib olish bo‘yicha sahnalashtirilgan mashg‘ulot o‘tkazildi.
Xitoyning Uxan shahri koronavirus o‘chog‘i hisoblanadi, bu va yana bir necha shahar karantinga yopilgan. Avvalroq Xitoy rahbari Si Szinpin koronavirus bilan bog‘liq vaziyatni “murakkab” deb atab, kasallikning tarqalish sur’ati oshganini tan olgan edi.
Mavzuga doir:
- Xitoyda tarqalgan koronavirus haqida bilish zarur bo‘lgan ma’lumotlar
- TIV Xitoyda bo‘lib turgan yoki u yerga bormoqchi bo‘lgan O‘zbekiston fuqarolarini ogohlikka chaqirdi
- Xitoyda tarqalgan yangi koronavirusning ilk alomatlari ma’lum qilindi
- Xitoyda o‘qiyotgan o‘zbekistonliklardan koronavirus haqida noto‘g‘ri ma’lumot tarqatib, vaziyatni keskinlashtirmaslik so‘raldi
Izoh (0)