Япония Хитойдаги янги коронавируснинг ўчоғи ҳисобланган Ухань шаҳридан ўз фуқароларини 28 январь куни чартер рейс билан эвакуация қилишга тайёгарлик кўрмоқда. Бу ҳақда 27 январь куни NHK телеканали хабар берди.
Куни кеча Япония бош вазири Синдзо Абэ Ухань шаҳридан японларни зудлик билан эвакуация қилиш имкониятлари кўриб чиқилаётганини журналистларга маълум қилган эди.
Япония ташқи ишлар вазири Тосимитсу Мотеги эвакуация режасини хитойлик ҳамкасби Ван И билан муҳокама қилиб, инфекция тарқалишининг олдини олишда Япония ёрдамга тайёрлигини билдирган эди.
Қайд этишларича, дам олиш кунлари давомида Япония Ташқи ишлар вазирлиги Ухань шаҳрида бўлиб тургани тахмин қилинган 710 нафар японияликнинг 430 нафари билан алоқа ўрнатишга муваффақ бўлган.
Хитой ҳукумати 2019 йилнинг 31 декабрь куни Ухань шаҳрида келиб чиқиши номаълум пневмония эпидемияси бошлангани ҳақида Жаҳон соғлиқни сақлаш ташкилотига ахборот берган эди. Мутахассислар касаллик қўзғатувчиси нима эканини аниқлаган — бу 2019-nCoV коронавируси.
Янги коронавирусни юқтириш оқибатида Хитойда вафот этганлар сони 27 январь куни тонгда 80 кишига етган. Хитой Соғлиқни сақлаш масалалари давлат қўмитаси маълумотларига кўра, жами 2744 киши касалланган.
Аввалроқ Франция ҳукумати Ухандаги ўз фуқароларини эвакуация қилишга қарор қилгани маълум бўлган эди; французлар ҳафта ўрталарида шаҳардан олиб чиқиб кетилиши, Францияга қайтгач, икки ҳафта давомида назоратда сақланиши кутилмоқда.
Маълумот учун, Ухань шаҳрида 30 нафардан 60 нафаргача ўзбекистонлик бўлиши мумкин, уларнинг аксарияти талабалардир. Аввалроқ Ўзбекистон Ташқи ишлар вазирлиги карантин эълон қилинган Ухань шаҳридан чет эл фуқароларини эвакуация қилиш бўйича мурожаатларга Хитой расмийлари рад жавобини бераётганини билдирган эди.
«Карантин киритилганидан сўнг бошқа давлатнинг элчихоналари ўз фуқароларини Ухандан эвакуация қилгани тўғрисидаги хабар ҳақиқатга тўғри келмайди», — дейилганди ТИВ ахборотида. Ўз навбатида, Ўзбекистон ёшлар умумжаҳон ассоциацияси Хитойдаги ўзбекистонлик талабалардан коронавирус билан боғлиқ вазият юзасидан нотўғри маълумот тарқатиб, вазиятни кескинлаштирмасликни сўраган эди.
Бунгача эса Ўзбекистон ташқи ишлар вазири Абдулазиз Комилов Ухандаги ўзбекистонлик талабалар «албатта олиб келиниши», бу борада Хитой расмийлари билан иш олиб борилаётганини маълум қилган эди. 26 январь куни эса Хитойда таҳсил олаётган ўзбекистонликларнинг биринчи гуруҳи қайтарилгани маълум бўлди — улар Тошкент аэропортининг ўзида жиддий текширувдан ўтказилган.
Изоҳ (0)