Хитойда янги турдаги коронавирус келтириб чиқарган пневмония авж олгани сабабли Қозоғистонда санитар назорати чоралари кучайтирилди. Олмаота аэропортида Хитойдан учиб келган самолётдаги «бемор»ни кутиб олиш бўйича саҳналаштирилган машғулот ўтказилди. Бу ҳақда «Informburo.kz» хабар бермоқда.
Ҳозирда Олмаота халқаро аэропортига Хитойдан кунига 2-3 та самолёт келиб қўнмоқда. Ҳафта мобайнида авиакомпаниялар 18 та рейсни амалга оширади. 4 та авиакомпания— Air Astana, Scat, Hainan Airlines ва China Southern Airlines самолётлари ҳар иккала томонга парвозни амалга оширади.
2020 йилнинг 1 январидан буён Хитойдан Қозоғистонга 7863 нафар йўловчи келган ва 4365 киши учиб кетган.Хитойда янги коронавирус туридан зарарланган ва вафот этган беморлар сони жадал ортиб бормоқда. Бошқа мамлакатларда ҳам Хитойга келиб, бу касалликни юқтириб кетган фуқаролар қайд этилмоқда.
Шу сабабли Олмаота аэропортида самолётда коронавирус гумон қилинган бемор аниқланганда бунга тезкорлик билан муносабат билдиришга қаратилган машғулотлар ташкил қилинди.
Бундай вазиятда самолёт экипажи, аэропорт хизматчилари, тиббиёт ходимлари, сайёҳлар ва жамоат транспорти ҳайдовчилари хавф гуруҳига киради.
Машғулотни Транспортда товар ва хизматлар хавфсизлиги сифатини назорат қилиш департаменти Олмаота аэропорти санитар-карантин пункти билан ҳамкорликда амалга оширди. Сценарий бўйича диспетчерга Хитойдан келиб қўнган самолёт бортида коронавирусдан зарарланган бемор борлиги маълум қилинди. Унинг ҳарорати баландлиги, йўтал тутаётгани ва аҳволи ёмонлиги айтилди. Самолёт бортида яна 150 нафар йўловчи ва 8 нафар экипаж аъзоси ҳам бор эди.
Махсус автотранспорт хизмати самолётни санитар қўниш майдонига кузатиб келди. Полиция терминалдан кириш ва чиқиш жойларини қуршаб олди, чегара ва божхона назорати тўхтатилди. Самолёт бортига махсус ҳимоя кийимидаги санитар-карантин назорати мутахассислари ва аэропорт тиббиёт ходимлари чиқди. Улар қўл тепловизори билан барча йўловчиларнинг тана ҳароратини ўлчаб кўрди. Шу вақтнинг ўзида юкхоналар ҳашарот ёки кемирувчилар бор-йўқлигига текширилди.
Шундан кейин йўловчилар трап орқали самолётдан автобусга, сўнг қўниш залига олиб келинди. Аэродромда уларнинг ҳужжатлари буюмлар билан бевосита контактнинг олдини олиш учун портатив ускуна ёрдамида текширилди.Бортга шифокор чиқди ва у кўрикдан сўнг дастлабки ташхисни қўйди: коронавирусга гумон. «Бемор» капсулада Олмаота шифохонасига олиб келинди.
Бу вақтда аэропортда ҳаво кемасининг якуний дезинфекция ишлари олиб борилди.
Йўловчилар тўлиқ кўрикдан ўтказилгандан сўнг қўниш залида уларнинг паспортлари текширилди. Уларга ўз саломатлигини кузатиб бориш, биринчи аломатлардаёқ зудлик билан шифокорга мурожаат қилиш тавсия этилди.
Маълумот учун, Хитойнинг касаллик авж олган Ухань шаҳрида қозоғистонлик 98 нафар талаба бўлиб турибди. Улар орасида вирус юқтирганлар йўқлиги айтилмоқда.
Изоҳ (0)