Любинко Друлович: Бозоров билан ҳолатда қизил карточка йўқ эди

Ўзбекистон олимпия терма жамоаси Осиё Чемпионати—2020 мусобақасининг учинчи ўрини учун кечган баҳсда Австралияга ютқазиб қўйди (0:1) ва Олимпиадага чиқиш имкониятидан қуруқ қолди.

Ўйиндан сўнг ўзбекистонликлар бош мураббийи Любинко Друлович ўйин ҳақидаги фикрлари билан ўртоқлашди.

«Олимпия ўйинларида иштирок этишдек имкониятни қўлдан бой бердик. Ҳозир ўйин ҳақида бирор гап айтишим қийин. Умуман олганда жамоам яхши ўйин кўрсатмади. Австралия яхши жамоа. Улар иккинчи бўлимни ёмон бошламади. Голдан кейинги қизил карточка аҳволимизни бутунлай ёмонлаштириб ташлади. Мени фикримча, бу қизил карточкага тортадиган вазият эмас эди. Бугун биз мағлуб бўлдик. Ҳеч нарса айта олмайман. Аслида мусобақани ёмон ўтказмадик», — деди Любинко Друлович.

— Ўзбекистондаги миссиянгиз якунланмоқда. Келажакдаги режангиз қандай?

— Тўғрисини айтсам, Ўзбекистон U-23 билан шартномам шу ойда якунига етади. Шогирдларимнинг мусобақадаги иштирокидан кўнглим тўлди. Йигитлар мусобақада борини бериб ўйнагани учун уларга раҳмат айтиб қоламан.

– Терма жамоа охирги ўйинларда яхши ўйнади-ку, якун кўнгилдагидек бўлмади. Бунга қандай изоҳ бера оласиз?

– Ҳа, охирги ўйинларда кичик вазиятларда имкониятни қўлдан бой бердик. Афсуски, охирги икки ўйин 0:1 билан якунланди. Иккала ўйинда ҳам анча вазият яратган бўлсак ҳам, ундан фойдалана олмадик. Энди йигитлар буни тезроқ унутишлари керак.

– Мураббий сифатида хатойингиз нимада бўлди деб ўйлайсиз?

– Қизил карточка олган Ойбек Бозоровни туширганимдан кейин 5 дақиқа ўтиб қизил карточка олди. Гол уриш, вазиятни яхшилаш учун қўлдан келганча ҳаракат қилдик. Шундай нарсалар борки, ҳатто уни мураббий ҳам назоратига ололмай қолади.

– Бундай натижадан кейин баъзи танқидларни қабул қилишга тайёрмисиз?

– Буни тўғри қабул қилиш керак. 40 йилдан бери футбол ичидаман. Ҳар қандай ҳолатда ҳам мағлуб бўлганингизда танқидлар бўлади. Ижобий ва салбий танқидларни профессионаллардек қабул қилиш лозим.