«Буюк Келажак» Facebook’даги саҳифасига кириш имкониятини йўқотганини маълум қилди

«Буюк Келажак» халқаро нодавлат нотижорат ташкилоти ўзининг Facebook’даги саҳифасига кириш имкониятини йўқотганини маълум қилди, деб ёзмоқда Spot.

Ташкилотнинг хабарида айтилишича, унинг Facebook’даги «INGO Buyuk Kelajak» саҳифаси учинчи шахслар томонидан нотўғри маълумот тарқатиш мақсадида фойдаланилган.

Ташкилот мазкур саҳифага обуна бўлганлардан обунани бекор қилишни, Facebook маъмурияти учун мазкур саҳифани сохта саҳифа деб белгилашни сўраган.

Қайд этилишича, «Буюк Келажак» фаолияти билан боғлиқ барча долзарб ва ишончли маълумотлар бундан буён ташкилотнинг расмий саҳифасида бериб борилади.

Шу пайтгача расмий бўлган ва энди сохта деб аталаётган «INGO Buyuk Kelajak» саҳифасида 20 январь, душанба куни махсус комиссия ташкилот директорининг ишини текшираётгани ҳақида хабар чиққан.

«Комиссия ижрочи директор лавозимидаги Зуҳра Азимованинг меҳнат қонунчилигини, шунингдек, «Буюк Келажак»нинг Этика кодекси қоидалари ва шартларини бузганлиги бўйича ҳаракатларини текширади», — дейилган хабарда.

Комиссия текшируви ҳақидаги мазкур хабарда қайд этилишича, «Буюк Келажак»нинг қоидаларига мувофиқ, раҳбар ирқи, терисининг ранги, дини, жинси, ёши, миллий келиб чиқиши, жинсий қарашлари, оилавий аҳволи, ногиронлиги, ташкилотда эгаллаб турган ўрни бўйича камситишга йўл қўйиши керак эмас.

«Буюк Келажак» ташкилотнинг барча аъзоларини жавоб чораларидан қўрқмасдан, қоидабузарликка йўл қўйган шахснинг лавозимидан қатъи назар саволлар беришда муаммоларни кўтаришга чақиради. Ташкилот тақдим этилган маълумотга жиддий ёндашади ҳамда уни батафсил ўрганади. Ташкилот ноқонуний ҳаракатлар ҳақида хабар берган кишига нисбатан қарши чоралар кўрилишига йўл қўймайди ёки бошқа йўл билан ўрганиш ёки текширишга ёрдам беради», — дейилади хабарда.

Мазкур хабар ташкилотнинг Facebook’даги янги саҳифаси ва Telegram’даги каналида мавжуд эмас. Ташкилот сайтидаги ҳавола эса айни пайтда сохта деб аталаётган саҳифага олиб киради.

Сўнгги ойларда ташкилот бир неча марта диққат марказига тушди. 2019 йилнинг кузида ташкилотнинг бир қатор аъзолари унинг таркибидан чиқди. Январь ойининг бошида эса PhD дипломи сохта бўлиб чиққан Азамат Акбаров экспертлар кенгаши таркибидан чиқариб ташлангани хабар берилган эди.