21 январь, сешанба куни Самарқанд шаҳридаги «Тинчлик» маҳалласида яшовчи аёл Д.Р. МИБ ходимларига қаршилик қилиб, уларга бензин сепиб ёқиб юбормоқчи бўлган. «Дарё» мухбирининг маълум қилишича, воқеа содир бўлган пайт МИБ ходимлари ёнида «Тинчлик» МФЙ раиси, маҳалла фаоли, ИИБ ходимлари бўлган.
— Ҳамманинг устига бензин сепиб юборди. Зўрға қўлидан «зажигалка»ни олдик. Латталарни ёқиб ҳамманинг устига ташлади, — дейди воқеа гувоҳларидан бири. — Фуқарога уйидан мажбурий чиқариш бўйича огоҳлантириш хати ҳам берилганди.
— Самарқандда қаршилик кўрсатиш ҳолати бўйича ходимларга шикаст етмаган, — дея маълумот берди МИБ вакили Фаррух Тошпўлатов. — Тўлов интизомини мустаҳкамлаш орқали қарздорликни камайтириш, энергия тармоқларига ноқонуний уланиш, суд ва бошқа орган ҳужжатларининг ижросини таъминлаш каби вазифаларини бажариш Бюро ходимларига осон кечмаяпти. Айрим ҳолларда фуқароларимиз ходимларнинг қонуний талабини бажариш ўрнига куч ишлатиб, қаршилик кўрсатиш билан масалани ўз томонига ҳал этиш мумкин деб ҳисобламоқда.
Таъкидланишича, 21 январь куни МИБ Самарқанд шаҳар бўлими давлат ижрочиси М.Бекмуҳаммедов 12 нафар давлат ижрочиси ёрдамида Самарқанд шаҳар судининг 2019 йил 12 сентябрдаги ижро ҳужжатига асосан жавобгар Д.Р.ни хонадонидан мажбурий чиқаришга уринганда Д.Р. давлат ижрочиларини ёқиб юборишга уринган. Д.Р. уйига кириб, ичкаридан сочиқни ёққан ҳолда кўтариб чиққан ва давлат ижрочиларига қарата отган. Ёнган сочиқ давлат ижрочиларига тегмаган. Лекин Д.Р. бу билан чегараланмасдан, хонадон ичидаги елим идишдаги бензинни олиб чиқиб, ҳар томонга шу жумладан, ёниб турган сочиққа ҳам сепган. Сепилган бензин давлат ижрочилари кийимларига ҳам теккан бўлса-да, давлат ижрочиларининг четлаб қолиши натижасида аланга уларнинг кийим бошларига тегмаган.
Мазкур ҳолатда бирор бир МИБ ходими ёки фуқаролар тан жароҳатлари олмаган. Д.Р. ИИБ ходимлари томонидан тинчлантирилган ва турли жойлардаги ёнғин ўчоқлари ёнғин ҳавфсизлиги ходимлари томонидан бартараф этилган. Ҳолат юзасидан фуқарога нисбатан Самарқанд шаҳар прокуратураси томонидан шу куннинг ўзида Жиноят Кодексининг 219-моддаси 2-қисми (Ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилиб, ЖПКнинг 221-моддаси тартибида ушланган.
Фаррух Тошпўлатовнинг маълум қилишича, 22 январь, чоршанба куни МИБ раҳбарияти иштирокида матбуот брифинги бўлиб ўтган. Брифингда ўтган йил давомида Бюро ходимларига қаршилик кўрсатиш билан боғлиқ 132 та ҳолат аниқланиб, айбдорларга қонуний чора кўрилгани айтилган.
Маълум қилинишича, Бюро ташкил этилгандан буён 4 нафар ходим ўз вазифасини бажариш вақтида вафот этган, 200 дан ортиқ ходимларга турли даражада тан жароҳати етказилган. Иш ҳажмининг кўплиги ва оғир шароитда ишлашни хоҳламаган 7300 дан ортиқ ходимлар эса ўз хоҳиши билан ишдан бўшатилган.
Изоҳ (0)