“Buyuk Kelajak” xalqaro nodavlat notijorat tashkiloti o‘zining Facebook’dagi sahifasiga kirish imkoniyatini yo‘qotganini ma’lum qildi, deb yozmoqda Spot.
Tashkilotning xabarida aytilishicha, uning Facebook’dagi “INGO Buyuk Kelajak” sahifasi uchinchi shaxslar tomonidan noto‘g‘ri ma’lumot tarqatish maqsadida foydalanilgan.
Tashkilot mazkur sahifaga obuna bo‘lganlardan obunani bekor qilishni, Facebook ma’muriyati uchun mazkur sahifani soxta sahifa deb belgilashni so‘ragan.
Qayd etilishicha, “Buyuk Kelajak” faoliyati bilan bog‘liq barcha dolzarb va ishonchli ma’lumotlar bundan buyon tashkilotning rasmiy sahifasida berib boriladi.
Shu paytgacha rasmiy bo‘lgan va endi soxta deb atalayotgan “INGO Buyuk Kelajak” sahifasida 20-yanvar, dushanba kuni maxsus komissiya tashkilot direktorining ishini tekshirayotgani haqida xabar chiqqan.
“Komissiya ijrochi direktor lavozimidagi Zuhra Azimovaning mehnat qonunchiligini, shuningdek, “Buyuk Kelajak”ning Etika kodeksi qoidalari va shartlarini buzganligi bo‘yicha harakatlarini tekshiradi”, — deyilgan xabarda.
Komissiya tekshiruvi haqidagi mazkur xabarda qayd etilishicha, “Buyuk Kelajak”ning qoidalariga muvofiq, rahbar irqi, terisining rangi, dini, jinsi, yoshi, milliy kelib chiqishi, jinsiy qarashlari, oilaviy ahvoli, nogironligi, tashkilotda egallab turgan o‘rni bo‘yicha kamsitishga yo‘l qo‘yishi kerak emas.
“Buyuk Kelajak” tashkilotning barcha a’zolarini javob choralaridan qo‘rqmasdan, qoidabuzarlikka yo‘l qo‘ygan shaxsning lavozimidan qat’i nazar savollar berishda muammolarni ko‘tarishga chaqiradi. Tashkilot taqdim etilgan ma’lumotga jiddiy yondashadi hamda uni batafsil o‘rganadi. Tashkilot noqonuniy harakatlar haqida xabar bergan kishiga nisbatan qarshi choralar ko‘rilishiga yo‘l qo‘ymaydi yoki boshqa yo‘l bilan o‘rganish yoki tekshirishga yordam beradi”, — deyiladi xabarda.
Mazkur xabar tashkilotning Facebook’dagi yangi sahifasi va Telegram’dagi kanalida mavjud emas. Tashkilot saytidagi havola esa ayni paytda soxta deb atalayotgan sahifaga olib kiradi.
So‘nggi oylarda tashkilot bir necha marta diqqat markaziga tushdi. 2019-yilning kuzida tashkilotning bir qator a’zolari uning tarkibidan chiqdi. Yanvar oyining boshida esa PhD diplomi soxta bo‘lib chiqqan Azamat Akbarov ekspertlar kengashi tarkibidan chiqarib tashlangani xabar berilgan edi.
Izoh (0)