21 январдан 22 январь кунига ўтар кечаси Самарқанд вилоятининг Ургут туманидан Қашқадарё вилоятига ўтувчи халқаро аҳамиятга эга М-39 Олмаота—Тошкент—Термиз автомобиль йўлининг Тахтақорача довонидан ўтган қисмида (1120—1135 км) қалин қор ёғиб, йўлнинг қатнов қисмида музлама ҳосил бўлган.
Йўлнинг 1132—1135 километрларида қатнов қисмидаги қорнинг қалинлиги 15—20 сантиметрни ташкил этган.
Самарқанд вилояти ИИБ ЙҲХБ ахборот хизматининг маълум қилишича, вилоят Фавқулодда вазиятлар бошқармасининг мазкур йўлда автомобиль қатновини амалга ошириш имкони йўқлиги ҳақидаги хулосасига кўра, автотранспорт воситаларининг ҳаракатланиши 22 январь куни соат 11:00 дан вақтинча тўхтатилган.
Транспорт воситаларининг ҳаракати вақтинчалик А-378 Самарқанд—Ғузор автомобиль йўли орқали ташкил этилган.
Йўлларнинг қатнов қисми қордан тозаланиб музламага қарши қум туз аралашмаси сепилиб, йўллар тозаланганидан сўнг соат 15:30 ларда транспорт ҳаракати очилган.
Самарқанд ҳамда Қашқадарё ИИБ ЙҲХБ ҳайдовчилардан транспорт воситасини бошқариш чоғида ҳушёр бўлишларини сўраяпти.
Изоҳ (0)