Тошкент шаҳар ҳокимлиги Бектемир, Сергели ва Юнусобод туманларидаги йўлларнинг транспорт оқими энг зич бўлган қисмларини қайта таъмирлаш ишларини бошлади. Бу ҳақда Тошкент шаҳар ҳокимининг ўринбосари Бахтиёр Раҳмонқулов маълум қилди.
Раҳмонқуловнинг қайд этишича, қайта таъмирланадиган йўллар бўйича лойиҳа ишлари ҳали ҳам давом этмоқда. Реконструкция қилинаётган участкаларда янги автобус бекатлари, пиёдалар ва велосипед йўлакларини қуриш кўзда тутилган.
Шунингдек, Қипчоқ кўчаси ва Тошкент ҳалқа автомобиль йўлини боғлайдиган янги ерусти йўл ўтказгич қурилиши режалаштирилган. Мазкур қурилма транспорт оқими жуда зич бўлган Янги Сергели кўчасида тирбандликни камайтиришга хизмат қилади.
Шу билан бирга, Сергели туманидаги автомобиль бозорига кириш ва чиқиш йўлларини қайта қуриш режалаштирилган. Қайта қуриш тугагандан сўнг, Янги Сергели кўчасидан кириш амалга оширилади, чиқиш эса ҳалқа автомобиль йўлига амалга оширилади.
Лойиҳалар доирасида қуйидаги ишларни амалга ошириш режалаштирилган:
- Янги Сергели кўчасининг Жанубий вокзалдан Қипчоқ кўчасигача бўлган 6,6 километр қисмини реконструкция қилиш;
- Аҳмад Дониш кўчасининг Mega Planet савдо марказидан Нурафшон кўчасигача бўлган 6,4 километрли қисмини реконструкция қилиш;
- Фарғона йўли кўчасининг Кичик ҳалқа автомобиль йўлидан Ҳусайн Бойқаро кўчасигача бўлган 7,6 километрли қисмини реконструкция қилиш.
Изоҳ (0)