Ўзбекистоннинг Хитой Халқ Республикасидаги элчихонаси берган маълумотга кўра, Хитой расмий идоралари Ухан шаҳри (Хубэй провинцияси)да тарқала бошлаган коронавируснинг янги шакли 2019-nCoV’дан 2020 йил 20 январь ҳолатида жами 4 киши вафот этган. Кейинчалик ҳалок бўлганлар сони 9 нафарга, кейинроқ эса 17 нафарга етган.
Хитойнинг масъул идоралари Ухан шаҳрида 136 нафар янги касалланиш ҳолатини аниқлаган. Reuters маълумотига кўра, касалликка чалинганлар сони 473 нафарни ташкил қилди. Пекин ва Шенчжен шаҳарларида беморларнинг аниқлангани илк бор тасдиқланди. Япония, Жанубия Корея, Таиланддан кейин коронавирус асоратлари АҚШ ҳамда Россияга ҳам етиб келган. Хитойнинг Гонконг махсус маъмурий ҳудудида ҳам 90 дан ортиқ касалланиш ҳолати рўйхатга олинган. Вьетнам ва Сингапурда айрим беморларнинг ушбу вирус билан касалланганлиги гумон қилинган.
ТИВ Консуллик-ҳуқуқий департаменти хорижда бўлиб турган ёки чет элга, хусусан, Хитойга боришни режалаштираётган ўзбекистонликларни зарурий эҳтиёт чораларини кўришга чақирган ва Хитой ҳудудидаги Ўзбекистон фуқароларига зарурат туғилган ҳолатларда мамлакатнинг Пекин шаҳридаги элчихонасига (Хитой, Мўғулистон, Шимолий Корея ва Филиппин) +8610-6532-6305 телефон рақами орқали ҳамда Шанхай шаҳридаги Бош консулхонасига (Шанхай шаҳри, Анхой, Чжецзян, Цзянси, Цзянсу, Хунан ва Фуцзян провинциялари) +8621-6307-1896 телефон рақами орқали мурожаат қилишлари мумкинлигини эслатиб ўтган.
Ўзбекистон ТИВ аввал ҳам Хитойда тарқалган вирус туфайли у ерга бормоқчи бўлган ўзбекистонликлар ва у ерда бўлиб турган фуқароларни эҳтиёткорликка чақирган. Ўзбекистон ССВ эса Хитойда тарқалган коронавирус туфайли чегарадаги санитар назоратни кучайтирганди.
Коронавирус хавфи туфайли Европанинг бир нечта компанияси охирги уч ҳафтада жиддий молиявий зарар кўрган. Хитойда коронавирус ҳақидаги маълумотларни яширган шахслар умрбод шарманда бўлишдан огоҳлантирилган, шунингдек, мамлакатда пластик пакет ва найчалардан фойдаланиш тақиқланган. Аввалига Хитойнинг Ухан шаҳрида оммавий туризм тақиқланди, кейинроқ Шимолий Корея коронавирус сабабли мамлакатга туристларнинг киришига тақиқ қўйган. Вирус сабаб Forbes’нинг энг бой одамлар рўйхатида етакчи алмашди.
Изоҳ (0)