Сиёсатни ташлаб, ижодкорликни танлаган «орзулар дизайнери». Кристиан Диор ҳақида фотомақола

Christian Dior бренди эркаклар ва аёллар учун либослар, пойабзаллар, парфюмерия ҳамда косметика маҳсулотлари, соат ва аксессуарлар билан машҳур. 21 январь — ушбу бренд асосчиси, француз дизайнери Кристиан Диор туғилган кун. У 1905 йил Франциянинг Гранвиль шаҳрида туғилган.

Фақат сиёсат эмас

Кристиан беш фарзандли оилада иккинчи бўлиб дунёга келган. Оиласи ўзига тўқ бўлгани боис у ва бошқа фарзандлар муҳтожлик нималигини билмаган. У ёшлигидан санъат ва архитектура бўйича таълим олишни истаган, лекин ота-онаси фарзандининг дипломат бўлишини хоҳлаб, уни сиёсий таълимга берган. Халқаро ҳуқуқ ва география фанларини ўзлаштириш ўрнига бўлажак кутюр вақтини музейларда ўтказган, рассомлик санъати тарихини, шунингдек, мусиқани ўрганган. Ўзини сиёсатда кўрмаган Диор таълимнинг 3-йилида ўқишни ташлаган. 1928 йилда Кристиан дўсти Жан Бонжак билан биргаликда ўзи истаганидек тасвирий санъат галереясини очган. Галерея Андре Дерен, Анри Матисс ва Пабло Пикассонинг суратларини ўз ичига олган.

Молиявий инқироздан олиб чиққан эскизлар

1930 йил Диор учун оғир бошланган. Акасидаги руҳий касаллик, онасининг саратон туфайли вафоти, отасининг иқтисодий инқирозга учраши уни депрессияга тушиши, буларнинг барчаси галереяни ёпишга сабаб бўлган. Вақтинча иш қидириб сарсон бўлган Кристиан ўзини турли соҳаларга уриб кўради. Турли қоқилишлар, омадсизликларга қарамай, у ўз йўлини яна ижод орқали топади. Аввалига таниқли журналлардаги эскизлардан нусха кўчириб суратлар чизади. Бора-бора у чизган суратлар мода оламидаги кишилар эътиборини тортади, Le Figaro Illustre журнали Кристиан муаллифлигида чизилган либослар ва шляпаларни чоп эта бошлайди. Иш қидришни четга суриб эскизлар кетидан кун кўрган дизайнер 1937 йилда даромади яхшилигидан шахсий турар-жой сотиб олади.

Менинг туғилган куним — илк коллекциям намойиши бўлган кун  

Кристиан Диор

Бундан 74 йил аввал, 1946 йил 16 декабрда Диор Парижнинг Монтель кўчасида мўъжазгина модалар уйига асос солган. 1947 йилнинг февралида эса мода ихлосмандларига New Look деб номланган коллекцияни тақдим этган. Подиумда  мафтункор, нозик қадди-қоматли моделлар этак қисми кенг, бел қисми эса камар, белбоғ ва тасмалар билан нозикликни акс эттирган нафис либослар тўпламини намойиш этган. Бундай силуэт мода оламида революция бўлишига сабаб бўлди. Коллекцияда Иккинчи жаҳон уруши йилларида ҳарбий ёки меҳнат либосларида яширинган аёлларнинг нозиклиги ва жозибасига урғу берилганди. Трапеция шаклидаги пастки қисми оқшом либосидек кенг, бел қисми ингичка қилиб бичилган либосларни кийган аёл ўзини алоҳида билиб қувонса, бежирим либосдаги гўзал сарвқомат атрофидагилар кўзини икки карра кўпроқ қувонтирган. Урушнинг даҳшатидан гўзаллик нималигини унутиб қўйган инсонлар «орзулар дизайнери»нинг ишларидан эстетик завқ олган. Harper’s Bazaar журналининг бош муҳаррири Кармель Сноу эса New Look’га мода оламидаги янги қиёфа деб таъриф берган.

Яратган либосларим — бу менинг ҳаётим. Уларда менинг ҳис-туйғуларим, бахт ва қувончим акс этади.

Кристиан Диор

Фото: «Moda Gid.ru»

Коллекциядаги энг чиройли образлардан бири Bar Suit (бар деб номланган жакет) эди. Жакет номининг бар деб аталиши, ғоянинг дизайнер ҳаёлига Plaza Athenee меҳмонхонаси барида ўтирганида келгани билан боғлиқ. 1960 йилда Bar Suit Dior модалар уйи томонидан Британиянинг «Виктория ва Альберт» музейига совға қилинган.

1948 йил Нью-Йоркда модалар уйининг филиали очилади, бир йил ўтиб ушбу бренд номи билан аксессуарлар, мехлар ва сумкалар лицензияланган. Бадавлат, таниқли инсонлар, аристократлар, Голливуд юлдузлари Christian Dior мижозлари бўлган. 1952 йилда Лондонда янги филиал Christian Dior Models Limited очилади. Бир йил ўтар-ўтмас компания Мексика, Канада, Куба ва Италияда фаолиятини давом эттирган.

Атир аёл ҳақида унинг дастхатидан кўра кўпроқ гапириши мумкин.

Кристиан Диор

Дизайнер аёллар гўзаллигини фақатгина либосда деб билмаган. Унинг фикрича, ўзини муносиб тутиш, дид ва фаросат аёлнинг асосий кўрки, лекин шунга қарамай, ташқи кўриниш ва тараладиган ифорга бефарқ бўлмаслик керак. Шу боис бўлса керак, атирга аёл образини якунловчи сўнгги чизиқ деб таъриф берган. Фикрининг тасдиғи сифатида, болаликдаги дўсти Эфтлер Луиш билан биргаликда ёқимли ифорни ўзида мужассам этган атир ишлаб чиқаришни йўлга қўйган. Miss Dior деб номланган атир тез орада дунёнинг турли бурчакларида талабгир бўлади. Атир Кристианнинг кичик синглиси Катринга аталган. Мадемуазель эмас, балки мисс деб аталиши эса унинг Англияга бўлган севгисидан далолат.

Кристиан Диор 1957 йилнинг октябрида 52 ёшида юрак хуружи туфайли тўсатдан вафот этган. Унинг ўлимидан кейин компанияни шогирди  Ив Сен Лоран, кейинчалик Марк Боан, Жанфранко Ферре, Жон Галлиано, Раф Симмонс ва Мария Грация Кюри бошқарган. Ҳозирда бренднинг йиллик даромади 20 миллиард еврони, ундаги жами ишчилар сони эса 76 мингдан ортиқни ташкил этади.

2017 йилда Лондондаги «Виктория ва Алберьт» музейида Кристианга бағишланган кўргазма бўлиб ўтган.«Кристиан Диор: Орзулар дизайнери» деб номланган кўргазма 2019 йил 2 февралдан 14 июлгача давом этган. 

Мавзуга доир: