Amazon компанияси асосчиси Жефф Безос яна дунёдаги энг бой одамлар рейтингидаги етакчилигини топширди, унинг ўрнини Louis Vuitton ва Dior эгаси Бернар Арно эгаллади.
Forbes журнали талқинига кўра етакчи 2020 йилда илк бор алмашмоқда ва бундай ҳолат яна кузатилиши тахмин қилинган.
Amazon онлайн-ретейлери асосчисининг капитали компания акциялари 0,7 фоизга арзонлашгач 760 миллион долларга камайган ва 115,6 миллиард долларни ташкил қилмоқда. Гарчи Безос учун 760 миллион доллар арзимаган пулдек кўринса ҳам бу уни Forbes Real-Time рейтингида 1-ўриндан тушиб кетиши учун етарли бўлди.
LVMH ҳашамдор буюмлари ишлаб чиқарувчи компанияси эгаси Бернар Арно энди Forbes журнали рейтингида сайёранинг энг бой одами деб эътироф қилинмоқда. Жума куни LVMH акциялари 0,7 фоизга қимматлашди, Арнонинг бойлиги эса 1,9 миллиард долларга кўпайди. Айни вақтда франциялик миллиардернинг бойлиги 117 миллиард долларга баҳоланмоқда. Тўрт ой аввал Арнонинг сурати Forbes журнали муқовасида чоп этилиб, унинг бойлиги 102 миллиард экани ҳақида ёзилганди.
«Бизни Microsoft билан таққосласа, компаниямиз у қадар катта эмаслиги маълум бўлади. Бу ҳали бошланиши», — деганди Арно Forbes’га берган интервьюсида.
Арно Microsoft асосчиларидан бири бўлган Билл Гейтсдан 7 миллиардга бойроқ, америкалик миллиардер Арно ва Безосдан кейин 3-ўринда бормоқда. Гейтс хайрия йўлида 95,8 миллиард маблағ сарфламаганида иккала миллиардердан ҳам олдинда бўларди.
Арнонинг LVMH компанияси учун 2020 йил оламшумул даромадлар билан бошланди. Ортда қолган ҳафтада Кендо бюти-брендлар гуруҳи Кat Von D брендининг қолган қисмини харид қилди. LVMH теннис коптокчасидек келадиган олмос — Lucara Diamond компанияси тарихида катталиги бўйича иккинчи қимматбаҳо тошни сотиб олди. Олмос 1758 карат ва бу Арнога жуда асқотади. Сабаби LVMH 2019 йил ноябрь ойида Tiffany & Co. заргарлик брендини 16,2 миллиардга сотиб олишини эълон қилган. Tiffany акционерлари келишув бўйича 4 февралда овоз бериш йўли билан бир тўхтамга келади.Ўтган йилнинг август ойида Арно бойликларини 100 миллиардга етказиб, бутун дунёда учинчи энг бой одамига айланган. У аввал ҳам Безосни Forbes рейтингида биринчи ўриндан пастга туширган. Бу охирги марта 2019 йил декабрида кузатилган. Икки миллиардерни рейтингда ажратиб турувчи маблағ 2 миллиард доллардан кам бўлгани туфайли улар 2020 йил давомида ҳам рейтингда тез-тез жой алмашиб туради.
Изоҳ (0)