Amazon kompaniyasi asoschisi Jeff Bezos yana dunyodagi eng boy odamlar reytingidagi yetakchiligini topshirdi, uning o‘rnini Louis Vuitton va Dior egasi Bernar Arno egalladi.
Forbes jurnali talqiniga ko‘ra yetakchi 2020-yilda ilk bor almashmoqda va bunday holat yana kuzatilishi taxmin qilingan.
Amazon onlayn-reteyleri asoschisining kapitali kompaniya aksiyalari 0,7 foizga arzonlashgach 760 million dollarga kamaygan va 115,6 milliard dollarni tashkil qilmoqda. Garchi Bezos uchun 760 million dollar arzimagan puldek ko‘rinsa ham bu uni Forbes Real-Time reytingida 1-o‘rindan tushib ketishi uchun yetarli bo‘ldi.
LVMH hashamdor buyumlari ishlab chiqaruvchi kompaniyasi egasi Bernar Arno endi Forbes jurnali reytingida sayyoraning eng boy odami deb e’tirof qilinmoqda. Juma kuni LVMH aksiyalari 0,7 foizga qimmatlashdi, Arnoning boyligi esa 1,9 milliard dollarga ko‘paydi. Ayni vaqtda fransiyalik milliarderning boyligi 117 milliard dollarga baholanmoqda. To‘rt oy avval Arnoning surati Forbes jurnali muqovasida chop etilib, uning boyligi 102 milliard ekani haqida yozilgandi.
“Bizni Microsoft bilan taqqoslasa, kompaniyamiz u qadar katta emasligi ma’lum bo‘ladi. Bu hali boshlanishi”, — degandi Arno Forbes’ga bergan intervyusida.
Arno Microsoft asoschilaridan biri bo‘lgan Bill Geytsdan 7 milliardga boyroq, amerikalik milliarder Arno va Bezosdan keyin 3-o‘rinda bormoqda. Geyts xayriya yo‘lida 95,8 milliard mablag‘ sarflamaganida ikkala milliarderdan ham oldinda bo‘lardi.
Arnoning LVMH kompaniyasi uchun 2020-yil olamshumul daromadlar bilan boshlandi. Ortda qolgan haftada Kendo byuti-brendlar guruhi Kat Von D brendining qolgan qismini xarid qildi. LVMH tennis koptokchasidek keladigan olmos Lucara Diamond kompaniyasi tarixida kattaligi bo‘yicha ikkinchi qimmatbaho toshni sotib oldi. Olmos 1758 karat va bu Arnoga juda asqotadi. Sababi LVMH 2019-yil noyabr oyida Tiffany & Co. zargarlik brendini 16,2 milliardga sotib olishini e’lon qilgan. Tiffany aksionerlari kelishuv bo‘yicha 4-fevralda ovoz berish yo‘li bilan bir to‘xtamga keladi.O‘tgan yilning avgust oyida Arno boyliklarini 100 milliardga yetkazib, butun dunyoda uchinchi eng boy odamiga aylangan. U avval ham Bezosni Forbes reytingida birinchi o‘rindan pastga tushirgan. Bu oxirgi marta 2019-yil dekabrida kuzatilgan. Ikki milliarderni reytingda ajratib turuvchi mablag‘ 2 milliard dollardan kam bo‘lgani tufayli ular 2020-yil davomida ham reytingda tez-tez joy almashib turadi.
Izoh (0)