«Тахиатош» темир йўл бекатида тепловоз машинисти нефть базасидан дизель ёқилғисини ноқонуний равишда сотаётганида ушланган. Кейинроқ у ишни ижобий ҳал этиш учун ИИВ ходимига 10 миллион сўм пора беришга уринган, деб хабар беради Қорақалпоғистон Республикаси ИИВ ахборот хизмати.
15 январь куни соат 15:00 ларда Тахиатош туманида жойлашган «Тахиатош» темир йўл бекатида тепловоз машинисти Й.А. ва унинг ёрдамчиси К.И. «Тахиатош» нефть базасидан 120 литр дизель ёқилғисини Нукус шаҳрида яшовчи фуқаро А.Т.га сотаётган вақтида Қорақалпоғистон Республикаси ИИВ Транспортда хавфсизликни таъминлаш бошқармаси «Нукус» бекатидаги бўлинмаси ходимлари томонидан ашёвий далиллар билан ушланган.
Ҳолат бўйича суриштирув ишлари олиб бораётган ИИВ Транспортда хавфсизликни таъминлаш бошқармаси «Нукус» бекати бўлинмаси бошлиғи, майор Ж.Й.нинг хонасига шу куннинг ўзида фуқаролар А.Т, Й.А., М.Й. ва К.И. келиб, унга 10 миллион сўм миқдоридаги пулларни ўзларига нисбатан тўпланган ҳужжатларни ижобий ҳал қилиб бериш эвазига бераётган вақтида Қорақалпоғистон Республикаси прокуратураси ва Ўзбекистон ИИВ Ўз хавфсизлиги бошқармаси Қорақалпоғистон Республикаси бўлими ходимлари томонидан ушланган.
Ўзбекистон Бош прокуратураси ҳузуридаги Иқтисодий жиноятларга қарши департаменти Қорақалпоғистон Республикаси бошқармаси ушбу ҳолат юзасидан Жиноят кодексининг 211-моддаси (Пора бериш) 1-қисми билан жиноят иши қўзғатиб, ҳозирда тергов ҳаракатлари олиб бормоқда.
Изоҳ (0)