“Taxiatosh” temir yo‘l bekatida teplovoz mashinisti neft bazasidan dizel yoqilg‘isini noqonuniy ravishda sotayotganida ushlangan. Keyinroq u ishni ijobiy hal etish uchun IIV xodimiga 10 million so‘m pora berishga uringan, deb xabar beradi Qoraqalpog‘iston Respublikasi IIV axborot xizmati.
15-yanvar kuni soat 15:00 larda Taxiatosh tumanida joylashgan “Taxiatosh” temir yo‘l bekatida teplovoz mashinisti Y.A. va uning yordamchisi K.I. “Taxiatosh” neft bazasidan 120 litr dizel yoqilg‘isini Nukus shahrida yashovchi fuqaro A.T.ga sotayotgan vaqtida Qoraqalpog‘iston Respublikasi IIV Transportda xavfsizlikni ta’minlash boshqarmasi “Nukus” bekatidagi bo‘linmasi xodimlari tomonidan ashyoviy dalillar bilan ushlangan.
Holat bo‘yicha surishtiruv ishlari olib borayotgan IIV Transportda xavfsizlikni ta’minlash boshqarmasi “Nukus” bekati bo‘linmasi boshlig‘i, mayor J.Y.ning xonasiga shu kunning o‘zida fuqarolar A.T, Y.A., M.Y. va K.I. kelib, unga 10 million so‘m miqdoridagi pullarni o‘zlariga nisbatan to‘plangan hujjatlarni ijobiy hal qilib berish evaziga berayotgan vaqtida Qoraqalpog‘iston Respublikasi prokuraturasi va O‘zbekiston IIV O‘z xavfsizligi boshqarmasi Qoraqalpog‘iston Respublikasi bo‘limi xodimlari tomonidan ushlangan.
O‘zbekiston Bosh prokuraturasi huzuridagi Iqtisodiy jinoyatlarga qarshi departamenti Qoraqalpog‘iston Respublikasi boshqarmasi ushbu holat yuzasidan Jinoyat kodeksining 211-moddasi (Pora berish) 1-qismi bilan jinoyat ishi qo‘zg‘atib, hozirda tergov harakatlari olib bormoqda.
Izoh (0)