Михаил Мишустин Россия бош вазири этиб тайинланди. Дмитрий Медведев эса Хавфсизлик кенгаши раиси ўринбосари лавозимини эгаллади

Россия президенти фармони билан Михаил Мишустин бош вазир лавозимини эгаллади. Бу ҳақда Кремлга таяниб, Meduza хабар бермоқда.

Шунингдек, Россия Хавфсизлик кенгаши раиси ўринбосари лавозими таъсис этилиб, унга Дмитрий Медведев тайинланди.

Фармонлар улар имзоланиши билан кучга кирди.

Дмитрий Медведев 15 январь, чоршанба куни Россия президенти Владимир Путин билан учрашувда ҳукумат раҳбари лавозимидан истеъфога чиқишини маълум қилди. Путин Хавфсизлик кенгаши раиси ўринбосари лавозимини жорий этиб, ушбу лавозимни эгаллашни Медведевга таклиф этишини айтганди. Путиннинг ўзи Россия Хавфсизлик кенгаши раиси ҳисобланади.

Медведевнинг истеъфосидан сўнг Путин Федерал солиқ хизмати раҳбари Михаил Мишустинни бош вазирлик лавозимига илгари сурганди. 16 январь, пайшанба куни Давлат Думаси Мишустин номзодини маъқуллади. Мишустин тез кунларда ҳукуматнинг янги таркибини таништиришга ваъда берди. Қонун бўйича янги бош вазирда ҳукуматни шакллантириш учун бир ҳафта муддат бор.