«Ўткан кунлар» фильмининг тўлиқ версияси бугун 10 та миллий телеканал орқали намойиш этилади

Бугун, 29 декабрь куни «Ўзбеккино» ва 10 та миллий телеканал «Ўткан кунлар» фильмининг тўлиқ версиясини бир вақтда намойиш қилиш акциясини ўтказади. Бу ҳақда Миллий агентлик матбуот хизмати маълум қилди.

Абдулла Қодирий романи асосида яратилган ушбу фильм намойиши ёзувчи таваллудининг 125 йиллигига бағишланади.

Жорий йилда Президент ташаббусига кўра 1969 йилда режиссер Йўлдош Аъзамов томонидан яратилган «Ўткан кунлар» фильмининг тўла версияси негатив плёнкадан қайта тикланиб, рақамли форматга ўтказилди ва 2019 йил 7 декабрь куни Ўзбекистонга тақдим этилди.

«Таниқли ҳамюртимиз, машҳур хайриячи Алишер Усмоновнинг беминнат кўмагида амалга оширилган мисли кўрилмаган бу тадбир миллий кинематографимизнинг дурдона асарларининг рақамли форматга ўтказилган версиясини Росия кинофондидан қайтариб олиб келиш миллий лойиҳасининг навбатдаги босқичи бўлди. Шу сабабдан ‘Ўзбеккинo’ миллий агентлиги ҳамюртимиз Алишер Усмоновга ўзбек халқига қилинган ушбу бебаҳо совға учун ўз миннатдорчилигини билдиради», — дейилади хабарда.

Фильм намойиши давлат ва нодавлат телеканалларда қуйидаги тартибда бошланади:

• «Ўзбекистон» телеканали — соат 21:40 (ўзбек тилида);
• «Ёшлар» телеканали — соат 10:20 (ўзбек тилида);
• «Маҳалла» телеканали — соат 18:30 (ўзбек тилида);
• «Оилавий» телеканали —соат 13:10 (рус тилида);
• «Маданият ва маърифат» телеканали — соат 15:10 (ўзбек тилида);
• «Кинотеатр» телеканали —соат 16:40 (ўзбек тилида) ва 20:10 (рус тилида);
• «Севимли» — соат 10:00;
• «Менинг юртим» — соат 22:30:
• «Зўр»ТВ — соат 11:00;
• «Миллий» — соат  08:00.