Тошкент шаҳар ИИББ «Панельний» қамоқхонасидаги шароитлар халқаро стандартларга жавоб беришини маълум қилди

Ижтимоий тармоқларда маъмурий қамоқ жазосига ҳукм қилинганлар сақланувчи Тошкент шаҳар ИИББга қарашли махсус қабулхона ҳақида турли салбий фикрлар тарқалган. Тошкент шаҳар ИИББ турли гап-сўзларга барҳам бериш мақсадида халқ орасида «Панельний» номи билан машҳур бўлган ушбу муассасадаги шарт-шароитлар билан таништирди.

Қайд этилишича, ИИББ махсус қабулхонасини қайта тиклаш ва ундаги камчиликларни бартараф этиш 2018 йилдаёқ режалаштирилган. Қурилиш ишлари 2018 йилнинг 5 сентябридан бошланиб 2019 йилнинг 25 майига қадар давом этган. Тошкент шаҳар ИИББ қурилиш ишларини доимий назорат қилиб борган.

Бугунги кунда махсус қабулхона биноси ва унинг атрофидаги ҳудуд ҳуқуқбузарлар билан муомала қилишнинг халқаро стандарт талабларига, хусусан, БМТнинг Маҳбуслар билан муомала қилишнинг минимал стандарт қоидаларига жавоб беради.

Қурилиш жараёнида юқори сифатли ишончли материаллардан фойдаланилган, бинонинг моддий-техник базаси янгиланган ва мустаҳкамланган, автоном иситиш тизими ўрнатилган, бино ҳудуди замонавий видео кузатув тизими билан жиҳозланган.

Бундан ташқари, лойиҳада учрашув хонаси ва телефон мулоқоти учун хоналарни яратиш ҳам ҳисобга олинган, кутубхона ҳам мавжуд.

Маъмурий жавобгарлик тўғрисидаги кодекснинг 23-моддасига муофиқ, маъмурий ҳуқуқбузарлик содир этганлик учун маъмурий жазо чораларидан бири сифатида маъмурий қамоқ назарда тутилган. Маъмурий қамоқни ўташ тартиби тўғрисида 2017 йил 9 январь куни қабул қилинган қонунда маъмурий қамоқни ўташ тартиби билан боғлиқ муносабатлар тартибга солинган.

Тошкент шаҳар ИИББнинг Махсус қабулхонасида Маъмурий жавобгарлик тўғрисидаги кодексдаги асосан қуйидаги моддаларда кўзда тутилган ҳуқуқбузарликларни содир этганлик учун 3 суткадан 15 суткагача ҳукм қилинган шахслар сақланади:

• 47-модда. Болаларни тарбиялаш ва уларга таълим бериш борасидаги мажбуриятларни бажармаслик.
• 47-4-модда. Вояга етмаган ёки меҳнатга лаёқатсиз шахсларни моддий таъминлашдан бўйин товлаш.
• 47-5-модда. Ота-онани моддий таъминлашдан бўйин товлаш.
• 56-модда. Гиёҳвандлик воситаларини, уларнинг аналогларини ёки психотроп моддаларни оз миқдорда ғайриқонуний равишда тайёрлаш, олиш, сақлаш, ташиш ёки жўнатиш
• 61-2-модда. Мулкни қасддан нобуд қилиш ёки унга зарар етказиш.
• 111-модда. Ҳайвонларга нисбатан шафқатсиз муносабатда бўлиш.
• 131-модда. Транспорт воситаларини маст ҳолда бошқариш.
• 136-модда. Транспорт воситалари ҳайдовчиларининг ва йўл ҳаракати бошқа иштирокчиларининг мастлиги ёки маст эмаслигини аниқлаш учун текширувдан ўтишдан бўйин товлаши.
• 137-модда. Йўл-транспорт ҳодисаси юз берган жойдан кетиб қолиш.
• 170-модда. Валюта бойликларини қонунга хилоф равишда олиш ёки ўтказиш.
• 183-модда. Майда безорилик.
• 187-модда. Жамоат жойларида алкогол маҳсулотини истеъмол қилиш.
• 188-3-модда. Тиланчилик қилиш.
• 190-модда. Фоҳишалик билан шуғулланиш.
• 194-модда. Ички ишлар органлари ходимининг қонуний талабларини бажармаслик.
• 194-1-модда. Ўзбекистон Республикаси Миллий гвардияси ҳарбий хизматчисининг (ходимининг) қонуний талабларини бажармаслик.
• 195-модда. Ички ишлар органлари ходимларининг ўз хизмат бурчларини бажаришларига қаршилик кўрсатиш.
• 1951-модда. Ўзбекистон Республикаси Миллий гвардияси ҳарбий хизматчиларининг (ходимларининг) ўз хизмат бурчларини бажаришларига қаршилик кўрсатиш.