Toshkent shahar IIBB “Panelniy” qamoqxonasidagi sharoitlar xalqaro standartlarga javob berishini ma’lum qildi

Ijtimoiy tarmoqlarda ma’muriy qamoq jazosiga hukm qilinganlar saqlanuvchi Toshkent shahar IIBBga qarashli maxsus qabulxona haqida turli salbiy fikrlar tarqalgan. Toshkent shahar IIBB turli gap-so‘zlarga barham berish maqsadida xalq orasida “Panelniy” nomi bilan mashhur bo‘lgan ushbu muassasadagi shart-sharoitlar bilan tanishtirdi.

Qayd etilishicha, IIBB maxsus qabulxonasini qayta tiklash va undagi kamchiliklarni bartaraf etish 2018-yildayoq rejalashtirilgan. Qurilish ishlari 2018-yilning 5-sentabridan boshlanib 2019-yilning 25-mayiga qadar davom etgan. Toshkent shahar IIBB qurilish ishlarini doimiy nazorat qilib borgan.

Bugungi kunda maxsus qabulxona binosi va uning atrofidagi hudud huquqbuzarlar bilan muomala qilishning xalqaro standart talablariga, xususan, BMTning Mahbuslar bilan muomala qilishning minimal standart qoidalariga javob beradi.

Qurilish jarayonida yuqori sifatli ishonchli materiallardan foydalanilgan, binoning moddiy-texnik bazasi yangilangan va mustahkamlangan, avtonom isitish tizimi o‘rnatilgan, bino hududi zamonaviy video kuzatuv tizimi bilan jihozlangan.

Bundan tashqari, loyihada uchrashuv xonasi va telefon muloqoti uchun xonalarni yaratish ham hisobga olingan, kutubxona ham mavjud.

Ma’muriy javobgarlik to‘g‘risidagi kodeksning 23-moddasiga muofiq, ma’muriy huquqbuzarlik sodir etganlik uchun ma’muriy jazo choralaridan biri sifatida ma’muriy qamoq nazarda tutilgan. Ma’muriy qamoqni o‘tash tartibi to‘g‘risida 2017-yil 9-yanvar kuni qabul qilingan qonunda ma’muriy qamoqni o‘tash tartibi bilan bog‘liq munosabatlar tartibga solingan.

Toshkent shahar IIBBning Maxsus qabulxonasida Ma’muriy javobgarlik to‘g‘risidagi kodeksdagi asosan quyidagi moddalarda ko‘zda tutilgan huquqbuzarliklarni sodir etganlik uchun 3 sutkadan 15 sutkagacha hukm qilingan shaxslar saqlanadi:

• 47-modda. Bolalarni tarbiyalash va ularga ta’lim berish borasidagi majburiyatlarni bajarmaslik.
• 47-4-modda. Voyaga yetmagan yoki mehnatga layoqatsiz shaxslarni moddiy ta’minlashdan bo‘yin tovlash.
• 47-5-modda. Ota-onani moddiy ta’minlashdan bo‘yin tovlash.
• 56-modda. Giyohvandlik vositalarini, ularning analoglarini yoki psixotrop moddalarni oz miqdorda g‘ayriqonuniy ravishda tayyorlash, olish, saqlash, tashish yoki jo‘natish
• 61-2-modda. Mulkni qasddan nobud qilish yoki unga zarar yetkazish.
• 111-modda. Hayvonlarga nisbatan shafqatsiz munosabatda bo‘lish.
• 131-modda. Transport vositalarini mast holda boshqarish.
• 136-modda. Transport vositalari haydovchilarining va yo‘l harakati boshqa ishtirokchilarining mastligi yoki mast emasligini aniqlash uchun tekshiruvdan o‘tishdan bo‘yin tovlashi.
• 137-modda. Yo‘l-transport hodisasi yuz bergan joydan ketib qolish.
• 170-modda. Valyuta boyliklarini qonunga xilof ravishda olish yoki o‘tkazish.
• 183-modda. Mayda bezorilik.
• 187-modda. Jamoat joylarida alkogol mahsulotini iste’mol qilish.
• 188-3-modda. Tilanchilik qilish.
• 190-modda. Fohishalik bilan shug‘ullanish.
• 194-modda. Ichki ishlar organlari xodimining qonuniy talablarini bajarmaslik.
• 194-1-modda. O‘zbekiston Respublikasi Milliy gvardiyasi harbiy xizmatchisining (xodimining) qonuniy talablarini bajarmaslik.
• 195-modda. Ichki ishlar organlari xodimlarining o‘z xizmat burchlarini bajarishlariga qarshilik ko‘rsatish.
• 1951-modda. O‘zbekiston Respublikasi Milliy gvardiyasi harbiy xizmatchilarining (xodimlarining) o‘z xizmat burchlarini bajarishlariga qarshilik ko‘rsatish.