Norvegiyadagi Xalden Fengsel dunyodagi eng insonparvar qamoqxona hisoblanadi. U 250 mahbusga mo‘ljallangan. Ularning yarmi jiddiy jinoyatlarga — qotillik, hujum, zo‘ravonlik — qo‘l urgan. Mahbuslarning uchdan bir qismi giyohvand moddalar iste’mol qilgani yoki sotgani uchun o‘tiribdi. Qamoqxonadan asosiy muddao — bu odamlarni tuzatib, normal hayotga qaytarish, deb yozadi “Flytothesky.ru”.
Har bir kamerada to‘shak, kichkina muzlatkich, kitob javoni, televizor, stol-stul, alohida vanna xonasi (dush, hojatxona va qo‘l yuvish chanogֹ‘i bilan) bor. Hududda mahbuslar uchun do‘kon ishlaydi, u yerdan ovqat tayyorlashga kerakli mahsulotlar xarid qilinadi.
Shuningdek, mahbuslar xizmatida yaxshi jihozlangan Criminal Records ovoz yozish studiyasi, bog‘, ibodat xonasi, sport zali, o‘quv mashg‘ulotlari xonasi, kutubxona, kompyuter zali, mehmon qabul qilish xonasi va ko‘plab boshqa narsalar bor. Muddatini o‘tayotgan mahbus ta’lim olishi uchun barcha sharoitlar yaratilgan.
Kuzatuvchilar mahbuslar bilan doimiy ravishda muloqotda bo‘lib, ular bilan birgalikda qo‘shma tadbirlarda, masalan, voleybol o‘yinida yoki choyxo‘rlikda ishtirok etadi.
Ko‘pchilik bu qamoqxonani og‘ir jinoyatlar sodir etgan kishilar uchun ortiq darajada hashamatli deb hisoblaydi. Ammo qamoqxona boshlig‘i qasos hech qachon yaxshi natijaga olib kelmasligini ta’kidlaydi. Muddat o‘tashdan asosiy maqsad — mahbuslar jamiyatga qo‘shila olsin, risoladagidek hayot nima ekanligini his etsin va eski odatlariga qaytmasin, deb tushuntiradi u.
Statistika uning so‘zlarini tasdiqlaydi: Norvegiyada ilgari qamoqqa tushib, u yerga yana qaytadiganlar ulushi umumiy adaddan 20 foizni tashkil etadi. Boshqa davlatlarda bu ko‘rsatkich bir necha barobarga yuqoriroqdir.
Izoh (0)