13 январь, душанба куни халқ депутатлари Навоий вилояти Кенгашининг олтинчи чақириқ биринчи сессияси бўлиб ўтди. Бу ҳақда «Дарё»га вилоят ҳокимлиги ахборот хизмати маълум қилди.
Сессия ишида депутатлар вилоят ҳокимининг ўринбосарлари, вилоят ҳокимлиги гуруҳ раҳбарлари, котибият мудирлари, вилоят ташкилотлари, ҳуқуқни муҳофаза қилиш органлари раҳбарлари, туман ҳокимлари ҳамда оммавий ахборот воситалари вакиллари қатнашди.
Дастлаб 2019 йил 22 декабрда ўтказилган халқ депутатлари вилоят Кенгаши депутатлари сайлови якунлари бўйича вилоят сайлов комиссияси раиси Ш.Жўраевнинг ахбороти тингланди.
Шундан сўнг халқ депутатлари Навоий вилояти Кенгашининг регламенти ва доимий комиссиялари тўғрисидаги низом тасдиқланди.
Депутатлар халқ депутатлари вилоят Кенгашига сайланган депутатларнинг партия гуруҳларини рўйхатга олиш ҳамда вилоят кенгашидаги доимий комиссияларни тузиш тўғрисидаги масалаларни кўриб чиқди.
Сессияда ташкилий масала кўриб чиқилди. Ўзбекистон Президенти вакили А.Жўрабоев депутатларга давлат раҳбари томонидан Навоий вилояти ҳокимлигига Қобул Турсунов номзоди тавсия этилгани, номзод бўйича партия гуруҳларининг ҳар бири билан маслаҳатлашувлар ўтказилганини маълум қилди.
Депутатлар Қобул Турсунов номзодини қўллаб-қувватлаб, Навоий вилояти ҳокими лавозимига қайта тасдиқлади.
Изоҳ (0)