Samarqand shahridagi uylarda bir haftadan buyon gaz yetkazib berishda tez-tez uzilishlar kuzatilmoqda. Gaz yetkazib berish bilan bog‘liq muammolar sababli mahalliy aholi o‘tin yoqishni boshlamoqda. Bu haqda “Novosti Uzbekistana” xabar berdi.
Gaz bosimi 5-yanvar, O‘zbekistonda parlament saylovining ikkinchi turi bo‘lib o‘tgan kundan boshlab keskin pasaygan. Bu esa uylarda haroratning pasayishiga olib kelgan, ayniqsa, ob-havoning yomonlashishi sharoitida bu juda sezilarli bo‘lmoqda.
Nashrning xabar berishicha, mahalliy gaz idoralarining rahbarlari vaziyatni “O‘ztransgaz” tomonidan o‘rnatilgan limitlar bilan izohlamoqda. Shuningdek, ular har soatda Samarqanddagi vaziyat haqida gaz yetkazib beruvchilarni xabardor qilayotganini ta’kidlamoqda. Samarqand viloyati hokimi Erkinjon Turdimov ham vaziyat yuzasidan hukumatga murojaat qilgan, biroq vaziyat o‘zgarmayapti, deyiladi nashr tomonidan berilgan xabarda.
Qayd etilishicha, ikki oy avval Erkinjon Turdimov gaz limit bo‘yicha emas, balki ehtiyoj bo‘yicha yetkazib berilishini ma’lum qilgan edi. Bundan tashqari, mahalliy hokimliklar so‘nggi ikki yil davomida gaz quvurlari va boshqa qurilmalarni ta’mirlash uchun 92 milliard so‘m sarflagan. Nashrning ta’kidlashicha, gaz yetkazib beruvchi tashkilotlar iste’molchilar bilan shartnoma tuzmaydi va o‘z beparvoligi uchun hech qanday javobgar bo‘lmaydi, bu esa hukumat tomonidan tasdiqlangan O‘zbekiston iste’molchilariga gaz yetkazib berish qoidalarining buzilishi hisoblanadi.
Ijtimoiy tarmoqlarda samarqandliklar gazning o‘chishi sababli uylar juda sovib ketgani hamda odamlar ovqat pishira olmayotganidan shikoyat qilmoqda.
Iste’molchilarning qayd etishicha, gaz bilan bog‘liq muammolar avval ham bo‘lgan, saylov davrida vaziyat yaxshilangan. Iste’molchilar gaz hali ham kelayotgan joylarda esa undan g‘alati hid chiqayotganini aytmoqda, choynakdagi suvni isitish uchun esa ikki soat ketishi mumkin. Uyni o‘tin bilan isitishga o‘tgan kishilar esa juda ko‘p tutun yutishga majbur bo‘lmoqda.
2019-yilning noyabr oyida “O‘ztransgaz” raisi Ulug‘bek Saidov kompaniya aholiga gaz yetkazib berish uslubini o‘zgartirganini ma’lum qilgan. Avval kompaniya “O‘zbekneftgaz” tomonidan olingan resurslardan kelib chiqqan bo‘lsa, endilikda gaz resurslarga bog‘liq bo‘lmagan holda, asoslangan talabdan kelib chiqib yetkazib berilishi qayd etilgan edi.
Izoh (0)