Эроннинг юқори жанговар тайёргарликка эга ҳарбий-сиёсий тузилмаси ҳисобланган Исломий инқилоб муҳофизлари корпуси (ИИМК) Теҳрон яқинида қулаган Украина «Боинг»и ҳалокати учун жавобгарликни ўз зиммасига олди. Бу ҳақда ИИМК ҳарбий ҳаво кучлари ва ҳарбий космик кучлари қўмондони, бригада генерали Амир-Али Ҳожизода маълум қилди.
«Бўлган воқеа учун биз тўлиқ жавобгармиз ва, ҳукумат қандай қарор қабул қилишидан қатъи назар, биз унга бўйсунамиз», — деди Ҳожизода. Ҳожизоданинг маълум қилишича, Эрон ҳаво ҳужумидан мудофаа тизими йўловчи самолётини қанотли ракета деб қабул қилган.
Амир-Али Ҳожизоданинг қайд этишича, Эрон ҳаво ҳужумидан мудофаа тизими оператори қўмондонлик билан боғлана олмай, душман учоғи сифатида қабул қилгани учун Украина самолётига қарата ракета учиришга қарор қилган.
«Ё халал бериш тизими ишлаб кетган, ёки тармоқ банд бўлган, лекин у қўмондонлик билан боғлана олмаган. У атиги беш сония ичида қарор қабул қилиши керак бўлган. Афсуски, у нотўғри қарор қабул қилган ва нишонга қарата ракета учирган», — деди Ҳожизода.
Ҳожизоданинг қўшимча қилишича, Эрон ҳарбийлари Ироқдаги Америка базаларига ракета зарбалари берилаётган вақтда авиақатновларни тўхтатиб туришни сўраган, бироқ бу талаб бажарилмаган.
Эрон Қуролли кучлари Бош штаби «Украина халқаро авиалиниялари»нинг Теҳрон яқинида қулаган самолёти Эроннинг ҳаво ҳужумидан мудофаа тизими ракетаси билан уриб туширилганини 11 январь куни тан олган эди.
Изоҳ (0)