Эрон президенти Украина халқига ҳамдардлик билдирди ва Boeing ҳалокати айбдорларини жазолашга ваъда берди

Украина Boeing’ининг ракета билан уриб туширилиши айбдорлари жавобгарликка тортилади. Бу ҳақда Эрон президенти Ҳасан Руҳоний украиналик ҳамкасби Владимир Зеленский билан телефон орқали мулоқотида маълум қилди.

Руҳонийнинг таъкидлашича, юридик ва техник масалалар бўйича келгусида самарали ҳамкорлик учун Украина экспертлик гуруҳига зарурий барча кўмак кўрсатилади. Бу ҳақда Украина президенти матбуот хизмати томонидан икки мамлакат етакчилариниг телефон суҳбати якунларига бағишланган ахборотида сўз боради.

Шунингдек, Руҳоний самолёт қулаши оқибатида ҳалок бўлганларнинг шахсларини аниқлаш ва репатриация қилиш жараёнини имкон қадар тез ўтказишга ваъда берган. «Қариндошлари видолаша олишлари учун, келгуси ҳафтадаёқ — 19 январгача ҳалок бўлганларнинг жасадларини Украинага қайтариш биз учун фавқулодда муҳим аҳамиятга эга», — дея таъкидлаган Зеленский телефон суҳбати давомида.

Эрон «Украина халқаро авиалиниялари»нинг 8 январь куни қулаган самолёти Эрон ҳаво ҳужумидан мудофаа тизими томонидан тасодифан уриб туширилганини 11 январь куни тонгда тан олди. Украина президенти Эрон раҳбариятининг баёнотини «керакли йўналишда ташланган қадам» деб атади.

Теҳрон яқинида қулаган Boeing бортида 176 киши, жумладан, 11 нафар украиналик, шунингдек, Канада ва Буюк Британия фуқаролари бўлган.