Канада бош вазири Жастин Трюдонинг маълум қилишича, Эрон ўзининг ҳаво ҳужумидан мудофаа тизими томонидан уриб туширилган йўловчи самолёти ҳалокати учун тўлиқ жавобгарликни ўз зиммасига олиши керак.
Трюдо ушбу баёнотни бортида, хусусан, Канада фуқаролари ҳам бўлган Украина самолётини Эрон ракета билан уриб туширганини расман тан олганидан сўнг берди.
«Йўловчи самолётни уриб тушириш — бу даҳшат», — деди Трюдо. Унинг қўшимча қилишича, Эрон юз берган воқеа учун жавобгарликни тўлиқ ўз зиммасига олиши, изчил ва очиқ тергов ўтказиши ҳамда айбдорларни жавобгарликка тортиши керак.
«Адолат қарор топмагунича, биз тинчимаймиз», — деди Трюдо, унинг қайд этишича, «ҳалок бўлганларнинг оила аъзолари адолат қарор топганини кўришга ҳақли».
«Украина халқаро авиалиниялари»га тегишли Boeing 737 самолётининг 8 январь куни Теҳрон яқинида қулаши оқибатида 176 киши, жумладан, 63 нафар канадалик ҳалок бўлган эди.
Канада унинг мутахассислари авиаҳалокат терговида иштирок этишини талаб қилган эди. Трюдонинг маълум қилишича, Эрон ҳукумати бундай мутахассисларга виза бериш масаласида Канада билан ҳамкорлик қилмоқда.
Эрон авиаҳалокатдан уч кун ўтибгина, самолёт ракета билан тасодифан уриб туширилганини расман тан олди. Эрон президенти украиналик ҳамкасби билан телефон суҳбати давомида ҳодиса айбдорлари жазоланишига ваъда берган эди.
Изоҳ (0)