Шавкат Мирзиёев 11 январь куни Алишер Навоий номидаги Ўзбекистон Миллий боғига ташрифи давомида собиқ Ўзбекистон маданияти ва санъати кўргазмаси биносида амалга оширилаётган ишлар билан ҳам танишди.
Президент матбуот хизматининг хабар беришича, бино реконструкция қилиниб, у ерда Тошкент музейи ташкил этилиши режалаштирилган. Шавкат Мирзиёев музейнинг концепциясига оид лойиҳалар билан танишиб, уни бойитиш бўйича фикрларини билдирди.
«Тошкент тарихи, бу ерлик алломалар мероси ҳали тўлиқ ўрганилмаган. Бу жой илмий асосланган, шаҳарнинг буюк ўтмишини ёшларга, меҳмонларга етказадиган маскан бўлиши керак», — деб айтган Президент.
Қайд этишларича, янги музейни Ўзбекистон тарихи давлат музейининг филиали тарзида ташкил этиб, малакали илмий ходимларни жалб қилиш, замонавий ахборот технологиялари билан таъминлаш юзасидан топшириқлар берилган.
Изоҳ (0)