Бухоронинг Жондор тумани ҳудудидан ўтувчи М-37 йўлининг 303-километрида 9 январь куни соат тахминан 19:20 да 31 ёшли Г.Х. ва 30 ёшли Ж.Р. маст ҳолда безорилик қилган.
Улар туркиялик 63 ёшли М.Д.нинг бошқарувидаги ва давлат рақами Туркияники бўлган Mercedes-Benz юк машинасига ҳеч бир сабабсиз тош отиб, уни тўхтатган, сўнг ҳайдовчи М.Д.ни уриб-дўппослаб, унга тан жароҳати етказган.
Туркиялик М.Д.га олган тан жароҳати юзасидан биринчи тиббий ёрдам кўрсатилган. Ҳодиса содир бўлган жойдан қонга ўхшаш доғлар олинган ва тегишли экспертизалар тайинланган.
Ҳолат юзасидан Жондор туман ИИБ томонидан Г.Х. ва Ж.Р.га нисбатан Жиноят кодексининг 277-моддаси 2-қисми «б», «д» бандлари (бир гуруҳ шахслар томонидан қарияга нисбатан содир этилган безорилик) билан жиноят иши қўзғатилган.
Ҳар икки фуқаро жиноят иши бўйича гумон қилинувчи тариқасида иштирок этишга жалб қилиниб, процессуал тартибда ушланган. «Ҳозирда дастлабки тергов ҳаракатлари давом эттирилмоқда», — дейилади ИИВ ҳузуридаги Тергов департаменти ахборотида.
Изоҳ (0)