Шавкат Мирзиёев 11 январь куни Алишер Навоий номидаги Ўзбекистон Миллий боғнинг кўнгилочар қисмида амалга оширилаётган қурилиш ишлари билан танишди. Аввалроқ Президент боғдаги Адиблар хиёбони ва бўлажак Тошкент музейида қилинаётган ишларни бориб кўргани ҳақида хабар берилган эди.
Президент матбуот хизматининг қайд этишича, Миллий боғ ҳудудида замонавий маданият ва истироҳат боғи барпо этилмоқда. Вазирлар Маҳкамасининг 2017 йил 4 сентябрдаги қарори асосида бунёдкорлик ишлари икки босқичда амалга оширилмоқда.
Биринчи босқичда 9 гектар майдонда океанариум, амфитеатр, кинотеатр, кўнгилочар ўйингоҳ, эртакнамо қаср, мусиқали фаввора, автомобиллар тураргоҳи қурилади. Иккинчи босқичда 12 гектар ҳуддудда тематик парк, болалар учун автодром ва аттраксионлар, аквапарк бунёд этилади.
Шунингдек, кафе ва ресторанлар, савдо дўконлари ташкил қилинади. Ҳаво мусаффолигини таъминлаш мақсадида каштан, қарағай, япон софораси, магнолия, эман, қайин каби дарахтлар экилади.
Истироҳат боғи тўлиқ модернизация қилингач, бир кунда 10 минг кишигача хизмат кўрсатиш имконияти яратилади. «Бу аҳолининг мазмунли ҳордиқ чиқаришини таъминлаш билан бирга Тошкент шаҳрининг туристик жозибадорлигини ҳам оширади», — дейилади Президент матбуот хизмати ахборотида.
Шавкат Мирзиёев боғнинг йил бўйи ишлашини таъминлаш, оилавий дам олиш учун имконият яратиш бўйича кўрсатмалар берган. Боғда Самарқанд, Бухоро, Хива каби шаҳарлардаги қадимий обидалар макетини ўрнатиб, ёшлар ва сайёҳларнинг Ўзбекистон тарихига қизиқишини ошириш муҳимлиги таъкидланган.
«Шу ерда Тошкент шаҳри туманлари ҳокимлари билан мулоқот бўлди», — деб қўшимча қилган Президент матбуот хизмати. Мулоқот тафсилотлари маълум қилинмаган.
Изоҳ (0)